Yonga e finde Sii'aɓe ɓen :

Sii'a yaangan'ngal wonaa si'wanaa yiɗungol e wonan'ngol Sayyidinaa Alii (A.S.M) e jokku'ngolmo ɗoftoo kalako ko'o maaki jokka ngolle makko ɗen , ko non kadi woniri Sii'a wonaa si'wanaa wonan'ngol Sayyidinaa Alii (A.S.M) e Zurriya makko laaɓuɗo on , Sii'a yaa'ngal ko ɓun woni jokkungol e wonan'ngol , hino fiɓi finde Diina Lisilaamu kan , nden finde ko Nulaaɗo Alla on (S.A.M) addi kon , nden finde nde'o waɗi ka Deftere Alla teddunde nden , ko den woni ɓurunde mawnunde nden , e Geyngol makko laaɓungon'ngol , ngol ngeyngol tawungol Seedataa e Detere Allaahu nden haa'ñande ndarngal, ko ɗun waɗi hino tawaa e ko ɓuri himmunde e fende Sii'aaɓe ɓen :

   fiɓungol wondema Allaahu toowuɗo on ko'o ngooto tun , tawuɗo ko kanko wonimo Tageefo ngon fow fewtata e muuɗun , hiɓe fiɓi kadi hoolii wondema kanko Allaahu on wanaa'o siforɗo jibin'ngol maaɗun jibineende , o'maraa kadi hay'e huunde ko nandi e makko kanko kadi o'nandaa e hay'e huunde , ko non kadi hiɓe fiɓi hoolii kanko Allaahu on ko'o wuuruɗo Tageefo ngon fow ko'e ngorndan makko woniko darori , kanko Allaahu on ko'o neeɓuɗo mo'alaaka fuɗɗi , ko'o luttoowo mo'lannataa , hiɓe fiɓi hoolii kadi wondema kanko Allaahu on ko'o waawuɗo mo ronkataa hay'e huunde , wanaa'o karhaaɗo kadi e golle makko ɗen fow , ko wano non kadi hiɓe fiɓi hoolii kadi wondema , kanko Allaahu on ko'o ngando faamuɗo nunɗuɗo mo tooñataa , ko'o ngalo ko'o nanoowo yi'oowo  reenuɗo piijiɗin fow , hayhuunde kan reenaamo , kanko Allaahu on ko yiɗuɗo  moƴƴere nden  añi bone on , ko'o hunnoowo fodoore makko nden e kambaa makko on , ko'o yi'oowo mo'yi'etaake Adunawoo Laakarawoo , sabuna kanko Joomiraaɗo on wanaa'o ɓandu maaɗun maaɗun e ko nanditata e ɓandu fow , wanaa'o jolkindiraaɗo yummindiraa e hayhuunde , wanaa'o hawtondirɗo e hayhuunde , kanko Allaahu on ko'o newaniiɗo jiyaaɓe makko ɓen ko'o yumeteeɗoɓe , hino tawaa e neweende makko nden nulungon makko Annabaaɓe makko ɓen fii fewnu'ngol Tageefo ngon , hino tawaa neweende makko timmunde nden waɗungol makko Annabaaɓe ɓen hiwaaɓe e kala golle bonɗe e huuwungol bakkatuuji njani e tosooki fow , o'waɗi Annabiijo meeɗen Muhammadu on (S.A.W) timmoonde Annabaaɓe ɓen (sakkitorɗo e Annabaaɓe ɓen) Allaahu on hino ndaali : {ما كان محمد أبا أحد من رجالكم ولكن رسول الله وخاتم النبيين} suuratul-Ahzaabi.

   Allaahu on ndaali wondema , Nelaaɗo Muhammadu on wanaa'o Baaba hay'e ngooto e Worɓe mooɗon , ko woni ko'o Nelaaɗo Alla ko'o timmoonde e Annabaaɓe ɓen fow . kanko Allaahu toowuɗo on o'jippini e hoore Nulaaɗo on (S.A.W) kaawase ɓurɗo e mawnunde ɗun woni Al-Guruaana tidduɗo on , tawuɗo hino ngoongini ɗen Defte attiiɗende , ɓan'nginde feññini kala huunde , Al-guruaana on ka Sii'aaɓe ɓen ko'o sincaaɗo wanaa'o neeɓuɗo wano joomiraaɗo on non , hino tawaa e finde daƴƴere Diina kan wuutinɗin'ngol Allaahu on (Tawhiidi on) e fiɓungol hooloo fii Annabaaku'ngun , e fiɓungol wondema Allaahu on ko'o nunɗuɗo mo'tooñataa , wanoɓe fiɓiri kadi ɓe'hoolii fii ndarngan'ngal e fii imaamaaku ngun . kono imaamaaku ngun ko waajibi ka maɓɓe , ɗunko Allaahu on waɗaniɓe nden magaamu ɗon , wano'o waɗiri magaamu Annabaaku ngun non, si'wanaatun imaamaaku ngun hino sengo ley Annabaaku ngun moƴƴa , sabuna imaamu on ko'o lontiiɗo Annabiijo on (S.A.W) e nder piijiɗin fow non , ko'o reenuɗo Sari'a Diina Lislaamu kan , ko'o wurtoowo julɓe ɓen wattaɓe e Laawol feewungol , ayna Ñaawooje Diina kan haraɗe ɓeydaaka ɗe ɗuytaaka kadi .

Imaamu on ko'o feññinoowo ɓangina Aayeeje ɗen e Yewtereeji Annabiijo on o'fira o'fesita kalaka tawi hino mumaa e kala tawi hino nandita e sifaaji meeɗen ɗin , o'sendindira kadi Ñaawoore bonnitaande nden e bonnitunde nden , kanko imaamu on wanaa'o waɗaawo Sari'a wanaamo Wahyu jippotoo e muuɗun kadi , kanko ko'o lontiiɗo on'mo Wahyu jippotpp e muuɗun waɗa Sari'a on tunɗe .

    Imaamaaku ngun ka Sii'a waawataa wonde si'wanaa ɓenɓe Allaahu on toɗɗii yowonu , on Neɗɗo toɗɗaaɗo kadi haray  ko'o reenaaɗo e kala huuwungol ko boni maaɗun foljere , wano no Nulaaɗo on (S.A.W) reeniraa nonɗe . on'neɗɗo wonoowo imaamu haray ko ɓurɗo moƴƴunde yimɓe ɓen fow si'nelaaɗo on feƴƴii, e ɓurɗo suusunde yimɓe ɓen fow e ruuɗaande fow e ɓurɗo hulunde Allaahu on yimɓe ɓen fow , fii'haa'o waawa aynunde Sari'a on ñimna Ñaawoore Diina kan no haaniri wano no Allaahu on addirimo non , hara fii'ko yowitii e telemma Allaahu on o'hulataa feloore hay'e ngooto , tawata hay'e ngooto kadi waawataa sakkaandemo e fii waɗungol on Sari'a fotinon harako Musiɗɗo , maaɗun ko weldiɗɗo , maaɗun ko wi'ungol ko min woni min .