Imaamu Alii geɗal Alii geɗal Husaynu- Sajjaad (a s)



Yewtereeji suutaaɗi fii imaamu Zeynul Aabidiina (a s)

REWRO NGON:

DAÑEEDE MAKKO (A S):

Imaamu Alii Bunil Husaynu (a s) ko ñannde sappo e jowi sabbordu suumayee hitaande cappanɗe tati e jeetati fergu dañaa.

Ɓaawo soro makko Amiirul Mu’miniina anndii dañeede makko nden o welori ɗun fota o inni mo Alii.

RISAALATUL HUGHUUGH:

 Imaamu Alii Zeynul Aabidiina hino mari ɓataaki anndiraaki wi’eede Risaalatul Hughuuhg, Saduughu hino winndiki ka nder deftere makko wi’eteende Alkhisaal, Hasan Bun Su’uba hino waɗi ki ka der deftere Tahaful Ughuul, fillayeeji ɗin ɗiɗi hino seedi seeɗa.

Ko ki jeyaaki e ɓataakeeji mawnuɗi yewtuɗi fii nooneeji haggheeji, imaamu on hino yewti e nder majji haggheeji Allaahu fawiiɗi e hoore neɗɗanke ɗin, e haggheeji wonkii neɗdanke on e hoore makko, e haggheeji tere makko ɗen wano ɗenngal makko ngal maa noppi makko ɗin e gite makko ɗen, koyɗe makko ɗen juuɗe makko ɗen, e haggheeji woɓɓe go’o, ɓaawo ɗun o yewti fii haggheeji golleeji ɗin immorde e julde e korka e hajju e ittugol sadaka.. ɗin haggheeji hino yoni cappanɗe jowi.

Watta e ko hunnjiiɓe ɓen e taalibaaɓe duɗal makko ngal ko fillii kon immorde e hadiiseeji e mise ɗuuɗuɗe winndaaɗe e nder ko heewi e defte, Allaama Majlisii waɗii ko ɗuuɗi ka nder deftere makko wi’eteende bihaarul Anwaar.

LAAWOL NGURNDAN MAKKO E ƁURE MAKKO:

Hiri imaamu Sajjaad hino ɓuri yimɓe jamaau makko ngun fow moƴƴude ko kanko ɓurunooɓe janngude ko kanko ɓuruu rewugol Allaahu on, ko kanko ɓurunooɓe moƴƴude njikku hari ko’o teddinaaɗo hulaaɗo koɗo e taakan, giɗo e gaño, si tawii non ko ɓure makko ɗen hiɗe ɗuuɗi en raɓɓinɗinoto e yewtugol yere ko hawrodniri e yewtere nden.

1- Muñal makko ngal:

Fii yewtugol fii muñal makko ngal e yaafagol makko ngol en filloto oo batte wonuɗo e arude ɗoo: Hari gooto e horɓe makko ɓen hino juurana mo ndiyan satalde nden yani ka yeeso makko, korɗo on wi’i mo: Allaahu on hino wi’a: E moɗooɓe tikkere ɓen, imaamu on wi’i: Mi moɗii tikkere annden, korɗo on wi’i: E yaafotooɓe yimɓe ɓen, o wi’i (a s): Allaahu on yaafanike ma, korɗo on wi’i: Allaahu on hino yiɗi moƴƴinayɓe golle ɓen, imaamu on (a s) wi’i: Yahu a woni dimo sabu Allaahu on.

2- Cuucal makko ngal:

Darnde makko nden hino ɓannga e oo neɗɗo bewɗo Ubaydullaahi bun Ziyaad fewndo o yamiri warugol mo, imaamu on jaabii mo: E ko wareede hulɓinirtaa mi!  Enee  a anndaa wonnde wareede ko aada amen teddungal amen ngal ka Allaahu on ko yanugol sahiidi, e wi’ugol mo Yaziid: Ko an yo ɓiɗɗo Mu’aawiya e Sakhru e Hinndu hari ko soro an Alii Ibnu Abii Taalib joginoo raaya nelaaɗo Allaahu on (ñannde Badri e Khandagh nden ñannde hari baaba ma’a e Soro ma’a ko kamɓe joginoo raayaaji keereeru ngun.

3- Ɗuuɗugol ittugol sadaka:

Hari imaamu Zeynul Aabidiina (a s) ko’o heewuɗo ittugol sadaka jonna waasuɓe ɓen ka Madiina tentinii ittugol sadaka e hoore gunndoo, fillaama wonnde hari o ñaamataa ñaametee haa o itta sadaka yeru makko arii e nder deftere wi’eteende Hilliya wonnde hari imaamu Sajjaad hino ronndotonoo kunte bireede tummbere jemma o yaha o ittaɗe sadaka hara himo maaka : ittugol sadaka e hoore gunndoo ñifay tikkere jooma seniiɗo on, ɓaawo Alii Bun Husaynu feƴƴinii anndano wonnde hari hino fawtii ɓeynguureeji teemedere ka Madiina hari yimɓe Madiina ɓen hino wi’a: Men faɗaali sadaka kunndoo haa imaamu Alii Bun Husaynu (a s) feƴƴini.

4- Rinɗinngol daande:

Hari imaamu on (a s) ko heewuɗo rinɗinngol daande e nder laawol diina Allaahu kan fillaama e makko hari soono kala e saa’i o mooɓayno jiyaaɓe makko ɓen o rinɗinaɓe o wi’aɓe: Mi yaafike on enee on yaafanike lan? ɓe wi’a : Men yaafanike ma yo koohoo amen a bonnaali, imaamu Sajjaad wi’a ɓe: Wi’ee yo Allaahu on yaafo Alii Zeynul Aabidiina wano o yaafori men non sottu mo e yiite wano o sottiri daaɗe amen ɗen non, ɓe wii’a : Yo Allaahu on jaabin.



1 2 3 next