Imaamu Husaynu Bun Alii Assahiid (a s)



JANNDEEJI SUUTAAƊI FII IMAAMU HUSAYNU (A S)

REWRO NGON:

Dañeede makko nden (a s)

Ko Faatimatu geɗal nelaaɗo Allaahu on (s a w) woni ko dañi mo ka Madiina Munawwara ñannde tati sabbordu suumayee hitaande tataɓere maa nayaɓere fergu ɓaawo o addaama ka soro makko ɓe weltori mo fota ɓe noddini ka nder nowru makko ñaamuru ɓe darni ka nder nowru makko nanuru ɓe inni mo Alhusaynu ka ñalaande jeeɗiɗaɓere. Ɓe hirsani mo ngaari baalii ɓe femmbi mo hoore nden ɓe ittani mo sadaka kaalisi yeru teddeendi sukundu makko ndun wano ɓe waɗirannoo kotoo makko Hasan non. Imaamu Husaynu anndi huunde ko Yaziid neli e mo'o halfini Madiina on (Waliid bun Utbat) wonnde ko yo'o yo'o ƴettan mo bay'odnirgol e yimɓe Madiina ɓen, o wattidi e mayri kaydiiri tosokiri o wi'i{ ƴettu bay'ondirgol e Husaynu e Abdu Rahman Bun Abii Bakri e Abdullaahi Bun Zubayru no sattiri kala saliiɗo taƴaa daande makko nden addanaa mi hoore makko nden} o fenñiniri fiyaake on no newori woo

HEWTUGOL KONU UMAR BUN SA'ADU NGUN KARBALAA

Ubaydullaahi bun Ziyaad woni e sennditugol saffeeji julɓe ɓen e nder leydi Karbalaa ndin fow, hino jeyanoo e ɓe o ɓurunoo suɓaade fii waɗugol bone on e haɓugol imaamu Husaynu (a s) ko Amru Ibnu Sa'ad o foti mo wonnde si tawii o warii imaamu Husaynu o jonnay mo laamu ngun Reyyi, Umar bun Sa'ad suɓii aduna on, o dogi o iwtiri ɓaawo merere himo ɗowi guluuji nay haɓooɓe, o waɗi konu makko ngun takko imaamu Husaynu (a s) ɗun ko waɗunoo ko ñannde tati jommbente hitaande cappanɗe jeegoo e go'o fergu.

Ko adii Umar bun Sa'ad fuɗɗaade hawre nden hakkunde makko e imaamu Husaynu o yewtiduno e imaamu on, o winndani ibnu Ziyaad kaydi o ɗaɓɓiri mo feere nde fotti e imaamu on, ko woni ɗun ko jonnitugol imaamu Husaynu laawol ngol o hoota fii darnugol hibbugol ƴiiƴan ko sutii kon e nder leydi Iraak ndin.

Kaydi Umar Bun Sa'ad ndin hewti Ibnu Ziyaad o jaabii kaydi makko ndin, o immindini ndi e Samru Bun Jawsan, hiɗen waawi ɓuccude seeɗa e ɗun:

Mi imminiraali ma e Husaynu fii yo'a accan mo, wonaa fii yo'a yewtidu e makko maa tanƴinaa mo kisal e heddagol, wonaa kadi fii yo'a yaafo mo, wonaa kadi yo'a tefan mo ka an, ndaaru si tawii Husaynu e wonndiɓɓe makko ɓen naatii e nder laamu an ngun ɓe jebbilani ke ngu, addanan ɓe hara huunde waɗaaɓe, si tawii ɓe salike haɓuɓe haa waraaɓe.. anndu haray hiɓe hanndi e mu'un, si tawii Alhusaynu waraama daasir pucci ɗin ɓernde makko nden e ɓaawo makko ngon, anndu ko'o waasuɗo needi heewuɗo tooñugol.. si tawii a jaɓaali terto golle amen ɗen e konu amen ngun, accidaa Simru Bun Juusan e konu ngun, menen men yamirii mo ko men faalaa kon wassalaam.

Umar Bun Sa'ad henndii kaydi ndin o janngi ko woni e nder mayri kon, o woni e miijitagol ka wonkii makko hakkunde warugol imaamu Husaynu kon ko tawata ko ɗon o tanƴinori laawol heɓugol laamu e doole, e nokku toowuɗo ka lamɓe makko ɓen e hakkunde accugol hara o yanaali e imaamu Husaynu o ronnditoo masiibooji ɗin, kono wonkii makko kin pooɗi mo e laamu ngun e jawdi ndin, o ƴetti feere wonnde o ɗoway hare ɗen e nde o hibbata ƴiiƴan laaɓu ɗan ɗan ko'o wallondirɗo e Samru bun Zii Jawsan.



1 2 3 4 5 6 7 8 9 10 11 12 13 14 15 16 next