Sayyidinaa aliyya (A.S.M) :



 

Sayyidinaa aliyya (A.S.M)  :

(Alii bun Abii Taalib (A.S.M) : jibimaa hitaande 30 ɓaawo jibinengol Nulaaɗo on , ɓe sahindinaa hitaande 40 ferngu ) .

Jibineede Sayyidinaa Aliyya (A.S.M) :

     E ñalaande juma , sappoo'e tati lewru raajibi teddundu . duuɓi sappoo'e ɗiɗi ado nuleede Nulaaɗo Alla on Muhammadu صلی الله عليه وآله وسلم , ŋata on tiiɗi e Neene Faatima geɗal Asad , ontuma Abuu Taalib addimo ka Suudu kaaba teddundu , o;naadimo ton ontuma o;wi;imo : toolo –jooɗo-…ontuma o'yalti o'accimo ton , kanko Neene Faatima o'ɓanti Sookeeje makko ɗen o'fewtini e Allaahu toowoɗo on himo'wi'i :( jooma an min ko'mi gomɗinɗoma , komi gomɗinɗo konko iwri ka maaɗa wano Nulaaɓe e Defte , miɗo gomɗini kon'ngol Soro an Annabi ibraahiima (A.SM) ngol , miɗo hoolii ko kanko woniko mahi nduu Suudu maaɗa teddundu , mi'torikema sabu oo'mahuɗo nduu Suundu on e sabu on boobo wonɗoka reedu an yo'a newinanan jibingol an'ngol .

   Wonaali seeɗa tawi kanko Neene Faatima ɓe holli wondema ɓe jibinii Boobo ngorko , tawi ko kanko woni adiiɗo jibineende ka nder Suudu kaaba teddundu ɗon , hay'e ngooto jibintinaaka ɗon ɓaawo makko , ɗu'un ɗon fow ko sabu teddu ngal ko Allaahu lanɗo tedduɗo on teddini mawnini fii'makko kon .

     Ko'ɗon kisan weltinoowo on yehi ka Abuu Taalib e ka ɓeynguure makko fow , ɓe fow maɓe ontuma ɓe fewtiti e makko hiɓe heñii welo welo hino e geese maɓe , o;haalaniɓe fii mu'un on , ontuma ɓe ari ka jibinaaɗo on woni ɗon , ontuma kanko Nulaaɗo Alla suɓaaɗo on feƴƴi yeeso o'ƴetti Boobo on o'bakimo ka ɓernde makko o'addimo ka Suudu Abuu Taalib , tawi on'saa'iɗon kanko Nulaaɗo Alla on , himo wuuridi e Neene Khadiija ka Suudu maɓe ton , ilakoɓe jonbindiri , ari e ɓernde Abuu Taalib yo'o innu Boobo makko on (Alii) ko'nii woniri .

Kanko Abuu Taalib o'waɗi jamaa fii tendingol on Boobo makko mo'o jibinanaa ɗon , on waɗaaɗo Barki, o'hirsi Na'i e Dammi e Gelooɗi buy fii mu'un . yimɓe buy aruno tawaa nden inde Boobo ɗon , hiɓe jarnamo toranoomo barki , ɓe woniɗon haaneeɓi hiɓe e nder welo welo ,  hiɓe holla weltaare maɓe e fii on mawɗo ngorol maɓe e fii on Boobo makko mo'o jibinanaa ɗon.

  Balɗe ɗen feƴƴi heña , Boobo on hino waylitoo e hakkunde juuɗe mawɓe makko ɓen : Abuu Taalib e Neene Faatima , e ɓiɗɗo Bappa makko on (Nelaaɗo Alla on) Muhammadu (صلی الله عليه وآله وسلم) , tawi tumawoo haray himo ka Suudu Bappa makko (Abuu Taalib) ndun Suudu ka'o meeɗi e mu'un ngingol , e laaɓa'neende , e nder ɗin nduuɓi koɓe woni ɗon ila e paykun yaangal maɓe haaɓe woni suka .

 E'yyo ko'non wonirnoo , hari kanko Nulaaɗo Alla on Muhammadu (صلی الله عليه وآله وسلم ) hiɓe ara tumawoo tuma ka galle Bappa maɓe , fiikala hari ɓe jombii Neene Khadiija , hiɓe wuuridi e maɓe e Suundu feere , kono hari himo yiɗi Sayyidinaa Alii , himo kippamo , himo wowlanamo ko weltintamo tuma o'fini , himo ƴettamo baka ka ɓrende makko , hino yeƴa Danki makko kin tuma o'ɗaanii , e piiji ngoo buy ko'waɗa naynoomo .



1 2 3 4 5 6 7 8 9 next