Hunorde



Si tawii paykun kun ne’aama needi moƴƴiri ka tayre aranere ngurndan makko haray yanñugol needi makko ndin e nder tayre ngurndan makko araynde nden ƴettataa waghtu buy wonndude e reenugol sartiiji waɗɗiiɗi ɗin, ko woni ɗin :

1- Waɗugol mawɓe makko ɓen neediiji ɗin: Jannugol paykun e nder nden tayre ngurndan makko ɗon jannirtaake yewtugol mo tun, ko woni ko emmbere ko mawɓe makko ɓen wonndi e needi woo.. hay e gooto paykun maa mawɗo waawataa waɗude ko ne’oowo on laaɓanta mo kon si wonaa hara kanko tigi o ɗofti, ko fii ɗun waɗi si tawii en taway nelaaɗo Allaahu on (s a w) jaɓaano haɗanngol sonnaajo ɗaɓɓirnooɗo ɓe yoɓe haɗan mo ɓiɗɗo makko on ñaamugol tamaro sabu hari nelaaɗo Allaahu on (s a w) hino nafii tamaro nden ñannde, ɓe ɗaɓɓiri sonnaajo on nde’o arata janngo mu’un hara nelaaɗo Allaahu on nafaaki tamaro fii yoɓe waawu haɗugol paykun kun ñaamugol tamaro.

Ko goonga hino satti fota nde neeniraawo on ɗaɓɓirta ɓiɗɗo makko on yo’o luɓu ko’o fijirta kon paykun koɗun arukuyn ka maɓɓe.. paykun hino jannga e neene makko, ko kala ko’o janngi e mawɓe makko ɓen o waɗata hakkunde makko e woɓɓe goo.. ko wano non kadi tuma o naati o tawi baaba en makko e hoɓɓe ka nder suudu hara o salminaali ɓe.. baaba en makko karhay mo fii yo’o salmimɓe harale paykun kun hino anndi baaba en makko salmintaa tuma o naatata ka suudu .. ko gila ɗoo needi lislaamu ndin yamiriɓe yoɓe ɗofto ko ɓe faalaa yo fayɓe maɓɓe ɓen waɗu kon, Alghur’aana tedduɗo on hino yewti en ɗun: (Kabura maktan inndallaahi an taghuuluu maa laa taf’aluuna) (bone heewuɗo hino ka Allaahu on nde wowloton ko’on waɗataa) suuratu saffi aauya 3.

2-Jannugol fayɓe ɓen ko aldaa e tikkere maa monagol: En yewtiino e nder ko feƴyi kon wonnde jannugol paykoy koy needi moƴƴiri ɗun hino waɗɗii baabiraaɓe ɓen fii yo fayɓe ɓen heɓu needi moƴƴiri.. sabu neɗɗanke ko waawaaɗo janneede: (Allamal insaana maa lam ya’alam) (O anndini neɗɗanke huunde ko’o anndaano) Ndaaru suuratu Alaghi aaya 5.

 Neɗɗanke waawataa yewtude hara wonaa jannaaɗo si tawii o accaama feere o waawataa heɓude haala maa wowlugol, si tawii non ko mummunte o waawata wowlude hay si tawii o jannaama.. ko wano non kadi si tawii en waɗii boobo e ɓikkun mummunte e nder suudu en waɗii takko maɓɓe yiite huɓɓaa nge boobo on yahay ka yiite ngen woni ton o sikka ko nge fijirkun labaa kun.. ɓikkun mummunte on woɗɗitoto nge ɓaawo hikun anndi yiite ko fitina ka tagudi makkun, si tawii non ko neɗɗanke ko sabu janneede o faamirta.

Ko gila ɗoo ko woni golle mawɓe ɓen ko jannugol fayɓe maɓɓe ɓen sarti nde tawata wonaa ñaaɗugol e siccugol.. haanaa ka yewtaa mo hara hiɗa monii, wano tawiri sonnaajo on yiɗaa yo moodi makko yewtir mo monee wi’a: Hino haanunoo ka juuroyoɗaa kawtal ngal.. haray ko non kadi boobo yiɗaa yo neene makko yo yewtu mo hara himo monii wi’a mo: Hino waɗɗii nde reenataa jonci ma’a ɗin hara a tuuninaali ɗi, ko ɓuri hanndude kon ko nde wi’ataa mo e hoore doy: Si tawii a reenii conci ma’a ɗin hara ɗi tuunaali haray ɗun hino foti, laawol aranol ngol waɗay paykun kun o saltoo jaɓugol ngol, laawol ɗiɗaɓol ngol non o jaɓay kisan.

Ɗiɗaɓun e mu’un:

Ne’ugol paykun needi moƴƴiri nafa mu’un hino yiltoo e paykun kun e mawɓe makko ɓen e jamaa on.. hino jeyaa e ɗun yiɗugol yimɓe ɓen.. ko woni sabu ɗun ko tawde neɗɗo fow hino yiɗi jamaa ka tagudi makko, tuma kala yiɗugol wonuɓe takko makko ɓen ɓeydi neɗɗanke yaagal makko ngal ɓeydotoo, ko fii ɗun waɗi si tawii lislaamu on waɗani yila e ɗun fota haa o waɗi gollangol yimɓe ɓen huunde rewirde mo, arii e nder hadiise Ghudusii wonnde ko konngol Allaahu seniiɗo on (Tagu ngun ko ɓeynguure an.. ko ɓurimmi ɓattaade e mo’on ko’on ɓuruɗo kurkanaade ɓeynguure an nden).

Fillaama e imaamu Alii (a s) wonnde o maakii: (Moƴƴingol hakkunde yimɓe ɓen ɓuri moƴƴude idii julde e korka).

Ko ɗun waɗi hino hatonnjini toppitagol paykun kun fii yo kun yiɗu yimɓe ɓen kon ko tawata paykun kun ko dañidaaɗo e makko mawɓe makko ɓen hino haani tammbitaade ɗun haa ɗun ñiiɓa ka nder wonkii paykun kun, ɗun ko nii gasirta:



back 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 next