Imaamu Ali Bun Abii Taalib (a s)



Yewtereji suutaaɗi fii imaamu Alii (a s):

DAÑEEDE MAKKO (a s)

Alii (a s) ko'e mbaadi ndi ɗuuɗaaka yi'eede dañaa, ñannde juma sappo e tati raajibi, duuɓi sappo e ɗiɗ ko adii nelaaɗo Allaahu on (s a w) neleede.

Arii e nder deftere wi'eteende (Kasful Khummati) fii dañeede makko wano woni arirde ɗoo nii:

Zeydu Bun Anghab wi'i: Hari min e Abbaas Bun Abdul Muttalib meɗen jooɗii.. ka nder suudu Allaahu hormanteeru tun Faatimatu Bintu Asad ari yumma imaamu Ailii (a s) hari himo sowii mo ko mo lebbi jeenay, tawi ŋata hino muusude mo, o wi'i: Jooma an! Min ko mi gomɗinɗo ma, gomɗini huunde ko immori ka ma'a immorde e Annabaabe e nelaaɓe, min ko mi goonginɗo konngol soro an annabi Ibraahiima njaatigi Allaahu e wonnde o mahii suudu ndun, waɗu barki on mahuɗo ndu'u suudu e on boobo wonuɗo ka nder reedu an newinanaa mi jibingol an ngol, mi yi'i suudu ndun hino seekoo Faatimatu Buntu Asad naati nder ton, o wirnii gite amen ɗen maadi ndin wonti ka ndi wonunoo ɗon, men faalaa udditude bogooore baafal ngal nde jaɓaali udditaade, men anndi ɗun ko e yamiroore Allaahu on, ɓaawo ɗun o yalti ka nder ñalaande nayaɓere boobo on hino ka juuɗe makko boobo on Alii geɗal Abii Taalib.

Annden non wonnde ko heewi e joomiraaɓe gannde julɓe ɓen e taariika yankooɓe maɓɓe ɓen fillike o kaawee ɗoo wano: Allaama Sibtu Ibnul Jawzii Al Hanafii ka nder deftere makko wi'eteende Tazkiratul Khawaas, e Seykhu Tuusii ka nder deftere makko Amaalii, e Seyku Mufiid ka nder deftere makko Al Irsaad, e Seyyidu Ibnu Taawuus ka nder deftere makko Attaraa'if, e Mas'uudii ka nder defte makko Al Wassiyatu e Muruuju Zahabi e ko wonaa ɓee ɗoo.

Hino jeyaa e ko haanaa yewteede ɗoo wonnde ɓural ngal Alii (a s) heɓi ngal fewndo o dañaa ka nder suudu Kaaba, ɗun ko ɓural mawngal ngal ɗuuɗaaka heɓeede e nder taariika neɗɗanke, ko kanko tun woni dañaaɗo ka nder suudu Kaaba goɗɗo go'o dañitaaka ɓaawo makko ɗun ko teddungal ngal Allaahu on okki mo.

KHADIR

nelaaɗo Allaahu on (s a w) lanni hajju maɓɓe waynitoru ngun, ɓaawo ɓe gaynii hajju ngun ɓe fokkiti artugol ka Madiina hiɓe wonndi e nden limoore jantaande yimɓe, ɓe hewti ka weedu wi'eteendu (khum) e nder nokkuure wi'eteende Juhfa, ka ɗate cele laawi yahayɗi madiina e Iraak e Misra. Ɗun ko waɗunoo ko alkhamisaare ñannde sappo e jeetati donkin, Seyyidunaa Jibriilu jippodi e oo aaya wonuɗo arude ɗoo immorde ka Allaahu on:

﴿يا أيها الرسول بلغ ما أنزل إليك من ربك﴾.



1 2 3 4 5 6 next