Taariika nelaaɗo meeɗen Muhammad (s a w)

Innde maɓɓe nden e dammbe maɓɓe nden e dañeede maɓɓe nden (s a w)

Ko kanko woni Muhammadu geɗal Abdullaahi geɗal Abdul Muttalib geɗal Haasim geɗal Abdu Manaaf geɗal Ghussayyi geɗal Kilaab geɗal Murra, dammbe makko ɗen hino yottoyii e Annabi Ibraahiima (a s).

Si tawii non ko yumma makko haray ko Aaminatu geɗal Wahab geɗal Abdu Manaaf.

Hari suriire aarabeeɓe ɓen ko adii lislaamu on hino wuurude e alhaali yirtogol ɓawre ɓawre e nder banŋeeji ɗin fow, hari majjere e anngal ganndal e taali hino huuɓiti hakkilaaji ɗin ɓaawo hari annduɗo winndugol jannga alaa Makka si wonaa seeɗaaɓe waaweteeɓe limeede e kolli wano taariika yankooɓe ɓen yewtiri non. Si tawii non ko ka banŋeeji finnde yankooji e ka faamu yankooji, hari ko majjiyanko on jaalii e nder on banŋe ɗon, hari ko rewugol sanamu e jinna e koode e Malaa'ika woni golle maɓɓe, ko seeɗaaɓe wonunoo e diina Annabi Ibraahiima maa Annabi Iisaa (a s).

Allaahu seniiɗo on muuyii yo Muhammadu (s a w) e nder leydi Makka o wona e nder leydi laɓɓinaandi ndin, hito tawhiidi on ɓantoo e nder Haramu hooliiɗo, ka haramu Ibraahiima e Ismaa'iila (a s) nden huunde  mawnde ko waɗunoo ko ñannde sappo e jeeɗiɗi paran hitaande 571 jibineede Annabi Iisaa, ko nden hitaande wi'itee hitaande ngelooɗi, nden hitaande nde Abrahata Al Habasii arunoo ɗaɓɓiti Makka, on wonndunooɗo e konu mawɗi, Allaahu seniiɗo on bonni pewje maɓɓe ɗen, wano ɗun yewtiraa ka nder suuratu Fiili non.

Mawnugol maɓɓe ngol (s a w)

Hari hino jeyaa e mbowdi aarabeeɓe ɓen si tawii ɓe jibinanaama  boobo ɓe ɗaɓɓanay mo muyninoowo, on tuma soro Annabiijo on woni e ɗaɓɓangol mo muyninoowo, fii yo'o wonu e juuɗe on o mawna ko'o laaɓuɗo ɗenngal, soro makko heɓile ne'oowo yurmeteeɗo wi'eteeɗo (Haliimatu Sa'adiyya) nelaaɗo Allaahu on e nder paykun yaagal maɓɓe ngal ko'e juuɗe on muyninoowo ɓe wonunoo, ɓaawo ɗun ɓe arti ka soro maɓɓe.

Ko nii ɓe njanɗiri ko ɓe laɓɓinaaɓe e junuubi e goopi ko ɓe woɗɗitiiɓe mbowdiiji majji yanko ɗin e finnde majji ɓoyliiɗi ɗin, ɓe anndiranooma gila suka yaagal maɓɓe ngal woɗɗitagol sanamuuji ɗin e miijitagol fii jeyuɗo kammuuji ɗin e leydi ndin.

Laawol ngurndan maɓɓe ɗan (s a w)

Hari nelaaɗo Allaahu on (s a w) ko adii ɓe neleede ko ɓuruɓe moƴƴude e jogaade ngorgu e yimɓe maɓɓe, ko kamɓe ɓurunoo moƴƴude njikku, ko kamɓe ɓurunoo teddude huuwondiral, ko kamɓe ɓurunoo moƴƴude, ko kamɓe ɓurunoo mawnude faamu e hoolaare, ko kamɓe ɓurunooɓe goongugol e yewtere, ko kamɓe ɓurunooɓe woɗɗitaade bonki e lorrugol, haa ɓe wi'i ɓe (Al Amiin) hoolaaɗo, sabu huunde ko Allaahu on mooɓi e maɓɓe piiji moƴƴuɗi, hari hiɓe wuurude kono wonaa no wonndiɓɓe maɓɓe e ɗimmooɓe maɓɓe woni e wuurirde, hari hiɓe wuurude toppitannde Allaahu seniiɗo on hino huuɓi ɓe, neweende ne'oowo on hino huuɓiti banŋeeji ngurndan maɓɓe ɗan fow, hiɓe ne'eede needi hertiindi immorndi ka Allaahu seniiɗo on, ko fii ɗun waɗi hari kamɓe Nelaaɗo Allaahu on (s a w) hari hiɓe maaka: (Jooma an ne'ii lan o moƴƴinii needi an ndin).

Si tawii non ko fii njikkuuji maɓɓe e needi maɓɓe ɓaawo ɓe neleede konngol Allaahu seniiɗo on yonay en; (وَإِنَّكَ لَعَلَى خُلُقٍ عَظِيمٍ) (anndu an hiɗa e nder njikku mawngu) suuratu Ghalam, e konngol Nelaaɗo Allaahu on tigi (إنما بعثت لأتمم مكارم الأخلاق) {Anndee ko mi neliraa ko timmingol neediiji ɓuruɗi moƴƴude ɗin}.

Nuleede maɓɓe kamɓe Nelaaɗo (s a w)

Wahayu on gila ñannde o ari ka hoore leydi ɗoo haa ka fewndi ɗen ɗoo hannde, ko luttay ka hakkille yimɓe majjuɓe ɓen jiɓiliɓi miijo yankeejo e finnde yankeejo mettuɗo faamude, mo welaa huɓindaade.

Si tawii non ko firo miijo liimaanu ngun haray wahayu on firaa si wonaa jokkondirgol toppitannde Allaahu seniiɗo on e neweendeeji makko ɗin, ɗun ko yurmegol neɗɗanke majjuɗo woñiiɗo e ƴawnugol mo e ɗun. Sabu Allaahu seniiɗo on tagaali neɗɗanke accitiri mo nii hara ko'o majjuɗo o maraa fewnoowo, ko woni tun o waɗanii mo wahayu on laawol fii anndingol mo hoore makko anndina mo jooma makko taguɗo mo on, e laawol fewnugol mo fii moƴƴinngol ngurndan makko ɗan, e huuwondirgol e ñokonndooɓe makko ɓen, e ko honno o fewtirta taguɗo mo’on.

Konii yurmeende Allaahu nden e toppitannde makko nden fii jiyaaɓe ɓen o suɓantoɓe yimɓe hertiiɓe waaway ɓe yiitidude neweende makko nden fii ronndagol nelal ngal e yottingol hoolaare nden haa nde hewta yimɓe ɓen, ko ɓen woni Nulaaɓe ɓen e annabaaɓe ɓen:

(اللَّهُ يَصْطَفِي مِنَ المْلاَئِكَةِ رُسُلاً وَمِنَ النَّاسِ إِنَّ اللَّهَ بَصِيرُ ).

(Allaahu on hino suɓoo e nder malaa'ikaaɓe ɓen nelaaɓe himo suɓoo kadi e yimɓe ɓen, Pellet Allaahu on ko yi'oowo)

(وَإِذَا جاءتهم آيَةٌ قَالُواْ لَنْ نُؤْمِنَ حَتَّى نُؤْتِىَ مِثْلَ مَا أُوتِيَ رُسُلُ اللَّهِ, اللَّهُ أَعْلَمُ حَيْثُ يَجْعَلُ رِسَالََتَهُ...). 

(Si tawii aayewal ariiɓe ɓe wi'a : Men gomɗintaa haa men jonnee sifa ko nelaaɓe Allaahu ɓen okkaa kon, ko Allaahu on anndi ko honto o waɗata nelal makko ngal) Suuratu an'aami aaya 124.

Nelaaɗo Allaahu on (s a w) ka ɓe heɓunoo duuɓi cappanɗe nay ɗon e nder ngurndan maɓɓe tedduɗan ɗan wahayu on jippinaa e maɓɓe e laawol ilhaamu e bugagol e makko, e huncangol mo e laawol koyɗol goonga wol, hari hiɓe yi'aynoo e nder ɗoyngol koyɗol sellungol, ɗun ko darja e darjaaji wahayu.

Arii e nder deftere wi'eteende Durrul Mansuur: Arannde ko nelaaɗo Allaahu on (s a w) foɗɗoraa e wahayu ko koyɗol sellungol, hari ɓe yi'ataanoo koyɗi si wonaa  ɗi goongay bimmbi.

Ɓaawo ɗun Allaahu seniiɗo on yiɗini mo weddagol hari hiɓe yahaynoo ka fammeere hiraa'a ɓe weddoo e nder nden fammeere –ko fammeere fanɗunde wonunde ka hoore fello hiraa ka funnaange ñaamo Makka - ɓe wona e rewugol Allaahu on, ɓaawo haray ɗon ɓe ukkondiraa e yimɓe ɓen, ɓe naata e luggingol miijo ɓe miijitoo fii ko wirnii e fewtugol e Allaahu seniiɗo on.

Ɓaawo ɓe heɓii duuɓi cappanɗe nay e nder ngurndan maɓɓe hitaande 13 ko adii fergu ngun (610 jibineede Annabi Iisaa) Jibriilu ari ɓe ka nder fammeere hiraa'a o yewti ɓe konngol wahayu, o yottini e maɓɓe wonnde ko'o annabaajo ɗee mofte ko'o nelaaɗo e majje.

Fillayeeji ɗin hino yewti wonnde ko adii jippaade e aayeeje Alghur'aana tedduɗo on ɗe seyyidunaa Jibriilu jannganoo Nelaaɗo Allaahu on (s a w) ko :

(أقرء بِاْسْمِ رَبِّكَ الَّذِي خَلَقَ* خَلَقَ الإِْنْسَانَ مِنْ عَلَقٍ * اقرأ وَرَبُّكَ الأْكْرَمُ* الَّذِي عَلَّمَ بِالْقَلَمِ * عَلَّمَ الإِنْسَانَ مَا لَمْ يَعْلَمْ*).

(Janngu innde jooma ma'a on taguɗo* taguɗo neɗɗanke e heɗɗere * Janngu innde jooma ma'a tedduɗo on* On anndinirɗo karabol * Anndini neɗɗanke ko'o anndaano) ɓaawo ɓe jannaama wahayu immorɗo ka Allaahu on, ɓe hooti ka ɓeynguure maɓɓe hiɓe wonndi e konngol wahayu, e lannditoreede ronndagol hoolaare nden nde ɓe habbitinoo, ɓe arti ɓe soɓɓindii ka belebon maɓɓe ɓe suddii ɓe suumii fii yoɓe fowto seeɗa, ɓe miijitoo ko ɓe fawaa kon, wahayu on ariɓe ka laawol ɗiɗaɓol o yamiriɓe immagol, accita belebon on fuɗɗoo noddugol yimɓe ɓen waajoo, nden yewtere hino ari e nder konngol Allaahu seniiɗo on:

(يَا أَيُّهَا المْدُثِّرُ * قُمْ فَأَنْذِرْ * وَرَبَّكَ فَكَبِّرْ * وَثِيَابَكَ فَطَهِّرْ..).

(Ko an yo suddiiɗo suumii* immo waajoɗaa*jooma ma'a teddinaa mo* conci ma'a ɗin laɓɓinaaɗi*) suuratu Mudassiru gila aaya 1haa aaya 4.

O yahi ko'o jaabiiɗo yamiroore Allaahu seniiɗo on ko'o weltinirɗo noddaandu makko ndun. Ko woni arannde mo ɓe noddi e laawol diina kan ko sonnaajo maɓɓe on Khadiija geɗal khuwaylidi, e geɗal bappa maɓɓe Ali geɗal Abii Taalib (a s) on marunooɗo duuɓi sappo e ngurndan makko e on saa'i, ɓe gomɗini nelaaɗo on ɓe goongini mo, ko ɗun wonunoo fuɗɗoode aranere noddaandu immorndu ka Allaahu seniiɗo on.

Ɓaawo ɗun gollanaynooɗo ɓe on Zeydu bun Haarisi gomɗini, hari Nelaaɗo Allaahu on hino suɓoo wonndiɓɓe maɓɓe ɓen gooto gooto, ɓe fewtinaali noddaandu maɓɓe ndun e yimɓe ɓen fow e nder on saa'i ɗon haa yamiroore Allaahu nden ari: (وَأَنْذِرْ عَشِيرَتَكَ الأْقْرَبِينَ) (Waajo gorol ma'a ɓurugol ɓattaade ngol).

Noddugol ka Allaahu on

Nelaaɗo Allaahu on (s a w) anndii wonnde ɓe waawataa feridude e noddaandu maɓɓe ndun ka fuɗɗoode mayru, sabu haray ɓe dartete e nder banŋeeji ɗin immorde e musrikuuna en, on tuma nelaaɗo Allaahu on (s a w) fuɗɗori laawol suuɗugol e gunndoo, ɓe woni e noddugol yimɓe ɓen ka nder Makka e hoore gunndoo kala moɓe tawi hino waawi wattaade diina hesa kan, haa sahaabaaɓe ɓen hewti yimɓe cappanɗe nayo, alhaali on woni non e nder duuɓi tati ɓaawo ɗun ɓe hunii noddaandu maɓɓe ndun e daande dow ka Makka e nder duuɓi sappo.

Ko non wennje ɗen fuɗɗori hakkunde nelaaɗo Muhammadu (s a w) e wonndiɓe maɓɓe ɓen e hakkunde yimɓe keefeeru ngun e sirku on e majjere nden, fewtondiral hakkunde feddeeji ɗin ɗiɗi ƴetti nokkuure yaajunde ghuraysi yankooɓe ɓen gollitiri ɗaɗe bonɗe ɗen fow e hulɓinngol, hare ɗe ɓe fuɗɗornoo nelaaɗo Allaahu on (s a w) ko haɓirgol ɓe hiila ko nden hawre wonunoo jalnorgol ɓe, kono nelaaɗo Allaahu on (s a w) jokindiri noddaandu maɓɓe ndun kamɓe e yimɓe seeɗaaɓe moƴƴunooɓe immorde e wonndiɓe maɓɓe, ɗun addi yo ayɓe ɓen waylu laawol ngol liddu noddaandu ndun ɓe woni e lorrugol nelaaɗo Allaahu on (s a w) e wonndiɓe maɓɓe ɓen tiinde e taasannde, e laawol bonuɗi taway ɗi hino yaadi e njikkuuji maɓɓe kamɓe ayɓe ɓen.

Si tawii non ko Muhammadu (s a w) kamɓe ɓe ƴettuno laawol go'o fii dartagol ɓe ko waɗugol bappa maɓɓe (Abuu Taalib) yeeso ayɓe ɓen fii dartagol ɓe, ɓaawo hari bappa maɓɓe ko jeyanooɗo e wonuɗo ɓe wallude kamɓe e noddaandu maɓɓe ndun e ɓaawo tawde ghuraysi yankooɓe ɓen hari hino hula mo, satteende nden ɓurti ɓeydaade, Ghuraysi yankooɓe ɓen woni e gollitirgol nooneeji hulɓingol ngol e lettugol ngol fow, kono hari nelaaɗo Allaahu on (s a w) e wonndiɓe maɓɓe ɓen hari ko jogiiɓe darnde tiiɗunde ɗen ɗate ɗe ayɓe ɓen wonunoo gollitirde dillintaaɓe.

Ɓaawo ɗen ɗate ɗon fow nafaali, ɓe waawaali senndindirde nelaaɗo Allaahu on (s a w) e bappa maɓɓe wonɗo ɓe reenude on (Abuu Taalib) ɓe gollitiri laawol kesol ko woni ngol laawol ko haɗugol huuwonndirgol e nelaaɗo Allaahu on e ɓen iwtirɓe ɓaawo maɓɓe, ɓe huuɓi nelaaɗo Allaahu on e ɓeynguure makko nden immorde e banii Haasim e Banii Abdul Muttalib ka parawol Abuu Taalibi) ɗun ko e hitaande jeeɗiɗaɓere gila nelaaɗo on nelaa, ngol ɗon laawol e laawol lettirgol ɓe heege ngen lanni, nelaaɗo Allaahu on (s a w) yalti e nder nokkuure nden ko ɓe fooluɓe, Allaahu seniiɗo on muuyi ɓaawo ɗun yo sonnaajo maɓɓe on Khadiija e Abii Taalib yo feƴƴin e nder hitaande sappaɓere nden gila nelaaɗo Allaahu on (s a w) nelaa, nelaaɗo Allaahu on (s a w) so'i suno e muuseendi haa ɓe wi'i nden hitaande ko hitaande suno, tippude e ɗun lorra Ghuraysi yankooɓe ɓen ɓurti sattude, ɓe haɓɓitii ɓe hewtay nelaaɗo Allaahu on (s a w) ɓe waɗi kofon fii warugol ɓe.

Jippagol Alghur'aana tedduɗo on

Yoga e joomiraaɓe gannde ɓen hino yaari wonnde Alghur'aana tedduɗo on jippino e nelaaɗo Allaahu on (s a w) laawi ɗiɗi:

Gooto e majji ko: Ko jemma laylatul Ghadri o jippinaa e maɓɓe o fow nde wootere, e laawol mumaangol.

Ɗiɗaɓo e majji on: O jippino e maɓɓe seeɗa seeɗa, e laawol fensitugol e nde dumunne ɗe Nelaaɗo Allaahu on (s a w) wonndi e mofte maɓɓe ɗen, gila ka ɓe nelanoo ɗon haa ɓe feƴƴini.

Ko jippingol mo e laawol mumaangol firi ko: Ko jippagol faamuuji immorɗi ka Allaahu on, tawayɗi hino mofti Alghur'aana on e gunndooji makko mawɗi ɗin ka nder ɓernde Nelaaɗo Allaahu on (s a w), fii yo ruuhu maɓɓe on heewu annoora alghur'aana yankeejo, Allaahu seniiɗo on hino wi'i ka nder deftere makko teddunde:

(إِنَّا أَنْزَلْنَاهُ فِي لَيْلَةِ الْقَدْرِ

{Men jippinii nde (Alghur'aana on e nder jemma eɓɓoore nden (laylatul Ghadri).

Ko woni o jippininde e laawol fensitaa ngol, ko jippagol nde e gonnguɗi mayre happaaɗi ɗin e aayeeje mayre ardondirɗe ɗen, ɗen aayaaje tawayɗe tuma go'o ko fii batteeji e piiji waɗuɗi fewndo nelal ngal ɗe yewti, ko konngol Allaahu seniiɗo on:

(كِتَابٌ أُحْكِمَتْ آيَاتُهُ ثُمَّ فُصِّلَتْ مِنْ لَدُنْ حَكِيمٍ خَبِيرٍ)

{Ko nde deftere nde aayeeje mu'un ñeñaa, ɓaawo ɗun ɗe fensitaa immorde ka ñeeño humpitiiɗo}. Suuratu Huud aaya 1.

Ɓannginen nafa jipporgol seeɗa seeɗa ngol e nder toɓɓe wonuɗe e arude ɗoo ɗen:

1- Nelaaɗo Allaahu on (s a w) rewii e alhaaliiji seeduɗi fota e nder duuɓi noogay e tati tippude e ko noddaandu ndun hawri e satteendeeji kon, e huunde ko ndu hawri e polgal e yaarugol yeeso, ɗun ko huunde nde neɗɗanke fow faamata, ɗun yiltoo e hoore konnguɗi makko e golleeji makko o battinora sabuuji mayru on e alhaaliiji mayru on, kono Alghur'aana on hawrondirno e nder ɗin duuɓi e nooneeji lo'ere e doole e satteende e hoyeende, fooleede, foolude, kono ɗun fow hari himo yahude e laawol makko ɓantiingol ngol, kono ɗun fow o nooninoraali nooneeji ɗi neɗɗanke nooninorta e nder ɗin alhaaliiji ɗon.

2- Annden wonnde jippinirgol Alghur'aana on seeɗa seeɗa ɗun hari ko ciifol maanaa yankewol jokkondirangol nelaaɗo Allaahu on (s a w) wano Allaahu seniiɗo on yewtiri ka nder deftere makko teddunde :

(وَقَالَ الَّذِينَ كَفَرُواْ لَوْلاَ نُزِّلَ عَلَيْهِ الْقُرْآنَ جُمْلَةً وَاحِدَةً كَذَلِكَ لِنُثَبِّتَ بِهِ فُؤَادَكَ وَرَتَّلْنَاهُ تَرْتِيلاً).

{Ɓen yedduɓe wi'i: Ko fii honɗun haɗi Alghur'aana on jippinee e makko (kanko nelaaɗo on) nde fow nde wootere, ko wano non ko fii yo men tabintinirɗun ɓernde ma'a nden (yo Nelaaɗo!) men janngiinge hattirde e janngugol}. Suuratu Furghaan aaya 32.

Si tawii wahayu on heyɗitay tuma kala goɗɗun waɗi, haray ko ɗun ɗon ɓuri tiiɗannde ɓernde nden, ko ɗun ɗon ɓuri tiiɗande toppitaade nelaaɗo on, ɗun ɗon waɗɗinay jippagol malaa'ikaajo on e makko, e heyɗintinugol ahadi ndin e makko, e semmbingol yela makko on ka walleede, e hoyfinangol mo ko waɗata immorde e satteendeeji e jiɓiliɓiiji.

Ko fii ɗun waɗi si tawii hiɗen tawa Alghur'aana on hino yamira nelaaɗo Allaahu on muñal tuma goo o wi'a:

(وَاصْبِرْ عَلَى مَا يَقُولُونَ وَاهْجُرْهُمْ هَجْراً جَمِيلاًَ)

{Munño yo Nelaaɗo e hoore koɓe wi'ata kon, taƴoɗaaɓe taƴannde labaande} Suuratu Muzammilu aaya 10.

Tuma go'o Alghur'aana on hino haɗaɓe sunagol wano Allaahu seniiɗo on yewtiri e konngol makko:

(وَلاَ يَحْزُنْكَ قَوْلُهُمْ إِنَّ الْعِزَّةَ لِلَّهِ جَمِيعاً).

{Wata konnguɗi maɓɓe ɗin sunine, teddungal ngal fow ko Allaahu on woodani}. Suuratu Yuunusa aaya 65.

3- Al ghur'aana tedduɗo on wonaa deftere sifa defte luttuɗe ɗen wallifeteeɗe fii jannugol e wiɗorgol gannde, ko woni tun Alghur'aana on ko gollayɗo fii waylugol neɗɗanke waylugol huuɓungol timmungol, ka nder hakkille makko e ka nder ruuhu makko e ka fonndo makko, ko woni fonndo Alghur'aana on ko moƴƴingol mofte e mahugol pinal, ngol laawol ɗon waawataa wonude nde wootere, ko woni tun e tagu mayre ko huunde yaaraynde seeɗa seeɗa, ko ɗun waɗi tawi bee Alghur'aana on jippora seeɗa seeɗa, fii yo mahegol waɗu, o wallinira hayre hayre, o ɓora ɗaɗi majjiyanko ɗin e laawol ñeeñal e faamu, ghissa fii harmingol beere nden ɗun hino yoni seedee e ko wonuɗen e wi'ude kon.

3- Nelal lislaamu ngal hari hino fewtinee jiɓiliɓiiji e tooñe, e lannde nooneeji ɗin fow immorde e yimɓe sirkuɓe ɓen, hari Nelaaɗo Allaahu on (s a w) hino hatonnjini nde ɓe dartorta ɗun darnde e firo nanondirgo e mu'un, ko ɗun waɗi ɗun waawata waɗude si wonaa seeɗa seeɗa, sabu tagu ɗin darndeeji ɗon e softeendeeji ngayngu yankooji hino jeyaa e tagu nde ɗun wonirta seeɗa seeɗa, ɗun hino hatonnjini e lekki jokkondirki, hino gasa hara ko ɗun Allaahu seniiɗo on faandii e nder konngol makko: ( وَلاَ يَأْتُونَكَ بِمَثَلٍ إِلاَّ جِئْنَاكَ بِالحَْقِّ وَأَحْسَنُ تَفْسِيرًا)  {Ɓe addantaama misal (yo Nelaaɗo), si wonaa men addante goonga kan e firo ɓurungo moƴƴude}.Suuratu Furghaana aaya 33.

Royreede Nelaaɗo Allaahu on (s a w)

(سُبْحَانَ الَّذِي أَسْرَى بِعَبْدِهِ لَيْلاً مِنَ المْسْجِدِ الحْرَامِ إِلَى المْسْجِدِ الأقْصَى الَّذِي بَارَكْنَا حَوْلَهُ لِنُرِيَهُ مِنْ آيَاتِنَا إِنَّهُ هُوَ السَّمِيعُ الْعَلِيمُ ).

{senaade woodanii on royruɗo jiyaaɗo makko on jemma gila ka juulirde hormanteere haa ka juulirde ɓurunde woɗɗude (Masjidul Aghsaa) nden nde men barkini sera mu'un fii yo men hollu mo aayeeje amen ɗen, ko kanko woni nanoowo annduɗo}. Suuratu Israa'i aaya 1.

Ko woni الإسراء  ka ɗenngal aarabeeɓe ɓen ko yaarugol jemma.

Ko woni  مسجد الأقصىko nokkuure wi'eteende Baytul Maghdis, ko woni القصي : ko nokkuure woɗɗunde ko waɗi si tawii juulirde nden wi'aa الأقصى ko ɓaawo ko juulirde ɓurunde woɗɗitaade Makka ka juulirde hormanteere nden  e Nelaaɗo Allaahu on (s a w) e wonnduɓe e makko yewtaaɓe ɓen woni ɗon.

Annden wonnde fillayeeji fillaaɗi e imaamuuɓe ɓen ka ɓeynguure suudu Nelaaɗo (s a w) hiɗi fenñini wonnde israa'u on waɗii laabi ɗiɗi, ko ɗun kadi faamotoo e aayeeje ɗen ka suuratu Najmi, ɓaawo Allaahu seniiɗo on hino wi'i: (وَلَقَدْ رَآهُ نَزْلَةَ الأُخْرَى) {Gomɗii o yi'ii mo laawol goo}

Taariika yankooɓe ɓen luutondirii ko honno israa'u on waɗiri, woɓɓe go'o wi'i wonnde Nelaaɗo Allaahu on royrano kamɓe tigi gila ka juulirde hormanteere makka haa ka Baytul Maghdis, ɓaawo ɗun kamɓe tigi ɓe ittaa ɗon ɓe naɓaa ka kammuuji toowuɗi, jamaa goo ko ɗun yaari, ko ɗun woni feere ɓuruɓe ɗuuɗude ɓen, wi'aama kadi wonnde ko ɓanndu maɓɓe ndun ɓe seenori gila ka juulirde hormanteere makka haa ka baytul Maghdisi, ɓaawo ɗun gila ka baytul maghisi ɗon haa ka asamaanuuji ko ruuhu maɓɓe on ɓe seenori, jamaa go'o kadi ko ɗun yaari, woɓɓe go'o wi'i ko ruuru on ko woni ɗun ko ɗoyngol sellungol Allaahu on holli Annabiijo makko on, ko ɗun bakaa e woɓɓe go'o.

Kono non si tawii ko miijitiiɗo e aayeeje royregol ɗen feeñanay mo wonnde ko Nelaaɗo Allaahu on tigi e ɓanndu maɓɓe ndun royraa, wonaa ruuhu maɓɓe on tun ko aldaa e ɓanndu, aaya on hino fenñini wonnde Allaahu seniiɗo on royrii jiyaaɗo makko on, wonaa ruuhu makko on, wano tawiri kadi ko royrugol wonaa koyɗol goonga wol wano woɓɓe sikkiri non.

Ko wonunoo faandaare nden e royregol ngol ko yi'ugol seeɗa e aayeeje mawɗe Allaahu seniiɗo on (..fii yo men hollu mo aayeeje amen ɗen)

(وَلَقَدْ رَأَى مِنْ آيَاتِ رَبِّهِ الْكُبْرَى){Gomɗii o yi'ii aayeeje jooma makko mawɗe ɗen}Suuratu Najmi aaya 18. Wattude e ɗun annden wonnde oo mu'ujiza mawɗo ɗun ɓeyday tabitugol gomɗimɓe ɓen e liimaanu maɓɓe ngun, e bawɗe Allaahu seniiɗo on. E nder on saa'i ɗon tigi lo'uɓe liimaanu ɓen dilluno e ɓen ɓe nawnaare woni ka nder ɓerɗe mu'un... ko'e ngol ɗon laawol anndiraa yaltuɓe e diina lislaamu ɓen taway ɓe diina lislaamu kan tabitaali e ɓerɗe maɓɓe.

Arii e nder deftere wi'eteende Miizaan: Yewtaama ka nder deftere Aamaali Saduugh e soɓɓindannde Abaan geɗal Usmaan ittude e Abii Abdullaahi Jaafaru Saadigh (s a)wonnde o maakii: Ɓaawo nelaaɗo Allaahu on (s a w) royraama ka Baytul Maghdis seyyidunaa Jibriilu Yettuno mo ka mburaagu ɓe ari Baytul Maghdis o holli ɓe mihiraabuuji Annabaaɓe ɓen ɓe juuli e majji, ɓaawo ɗun o natti ɓe Makka.

Si tawii non ko royreede on:

المعرج ko woni ɗun ko: ƴawrugal, ko ɗun woni laawol ngol malaa'ikaaɓe ɓen ƴewirta ngol.

Ko e nder jemma mo nelaaɗo Allaahu on ittaa Makka addaa baytul Maghdisi ko nden ñannde tigi ɓe royraa ka asamaanuuji toowuɗi gila ka juulirde Al Aghsaa haa ka kammuuji toowuɗi, ɗun ko mu'ujiza mawɗo wonannoo nelaaɗo Allaahu on, Allaahu seniiɗo on eltanno nelaaɗo makko on buraagu ngun.. ngu ƴawni mo kanko e seyyidunaa Jibriilu fii yo'o hollu nelaaɗo on laamuuji asmaanuuji ɗin e huunde ko woni e majji immorde e kaaweeji golle makko ɗen e tagu makko ngun senaade woodanii mo.. Suuratu Najmi yewtii fii on mu'ujiza mawɗo:

بِسْمِ اللَّهِ الرَّحْمَنِ الرَّحِيمِ

وَالنَّجُمِ إِذَا هَوَى* مَا ضَلَّ صَاحِبُكُمْ وَمَا غَوَى * وَمَا يَنْطِقُ عَنِ الْهَوَى * إِنْ هُوَ إِلاَّ وَحْيٌ يُوحَى * عَلَّمَهُ شَدِيدُ الْقُوَى * ذُو مِرَّةٍ فَاسْتَوَى * وَهُوَ بِالْأُفُقِ الْأَعْلَى* ثُمَّ دَنَا فَتَدَلَى * فَكَانَ قَابَ قَوْسَيْنِ أَوْ أَدْنَى* فَأَوْحَى إِلَى عَبْدِهِ مَا أَوْحَى * مَا كَذَبَ الْفُؤَادُ مَا رَأَى * أَفَتُمَارُونَهُ عَلَى مَا يَرَى * وَلَقَدْ رَآهُ نَزْلَةً أُخْرَى * عِنْدَ سِدْرَةِ المْنُْتَهَى * عِنْدَهَا جَنَّةُ المْأْوَى * إِذْ يَغْشَى السِّدْرَةَ مَا يَغْشَى * مَا زَاغَ الْبَصَرُ وَمَا طَغَى * لَقَدْ رَأَى مِنْ آيَاتِ رَبِّهِ الْكُبْرَى.   

Feccagol lewru ndun

En yettii Allaahu jom yurmeende huuɓunde e hertiinde

( إِقْتَرَبَتِ السَّاعَةُ وَاْنْشَقَّ الْقََمَرُ * وَإِنْ يَرَوْا آيَةً يُعْرِضُوا وَيَقُولُواْ سِحْرُ مُسْتَمِرٌ) 1 2

{Darngal ngal ɓattike lewru ndun feccike * Si tawii ɓe yi'ii aayewal ɓe ɗurnoo ngal, ɓe wi'a : ko mbilewu jokkondir ngu}. Suuratu Ghamari aaya 1 e 2.

Arii e nder deftere Tafsiiru Majma'ul bayaan ko firo mu'un woniri nii: Sirkooɓe ɓen mooɓondirno ɓe ari ka Nelaaɗo Allaahu on (s a w) ɓe wi'i: Si tawii ko'a goongoowo, feccan men lewru ndun pecce ɗiɗi, Nelaaɗo Allaahu on (s a w) maakani ɓe: Si tawii mi waɗii on gomɗinay annabaaku an ngun ? Ɓe wi'i : Eyyo, Nelaaɗo Allaahu on (s a w) lanndii jooma maɓɓe nde o waɗanta ɓe ko ɓe lanndii kon, lewru ndun feccii pecce ɗiɗi, nelaaɗo Allaahu on (s a w) hino nodda: Ko an yo kaariijo, ko an yo kaariijo, seeditee, woɓɓe wi'i: Muhammadu mbliɗike men, gorko wi'i: si tawii o mbilɗi on kono haray o mbilɗaaki yimɓe ɓen fow.

Ndee yewtere ɗoo sahaabaaɓe buy fillike nde, e nder defte yimɓe Sunna e sii'a ɓen, ko seeɗaaɓe tun yeddi nde, kono ɓaawo hinde lolli hakkunde sahaabankeeɓe ɓen ɗun haɗay lunndagol nde.

Jooni yilto ɗen e tafoodi aaya arano on, ndaaren ɓattagol darngal ngal wonndude e feccagol lewru ndun, sabu feccagol lewru ndun hino jeyaa e alaamaaji nuleede annabiijo meeɗen Muhammadu (s a w), neleede maɓɓe nden e jamaanu maɓɓe ngun ko jeyaa ɗun e sartiiji ɓattagol darngal ngal, wano tawiri aaya ɗiɗaɓo on hino yewta fii sanndolɗin ngol Ghuraysi yankooɓe ɓen, e ronkugol maɓɓe yankinanagol mu'ujizaaji ɗin, tuma kala ɓe yi'i mu'ujizaaji feeñyuɗi maa seedee laaɓuɗo ɓe saloo miijitaade mo, ɗoftoo mo, ɓe wi'a ɗun ko mbilewu jokkondir ngu yoga maggu hino nanndi e yoga, ɓaawo ɗun aayeeje hikkuɗe ɗon ɗen hino yewti fii yimɓe halkinooɓe ɓen e nder mofteeji feƴƴuɗi ɗin ɓaawo ɗun Allaahu seniiɗo on hino fillitoo fii maɓɓe ko'o feluɗo ɓe, o yewta bonnde alhaaliiji maɓɓe ɗin ñannde darngal, tuma ɓe yalti ka genaale ɓe ari ka hasboore.

Nelaaɗo Allaahu on (s a w) ka nder suriire Abii Taalib (as)

Ɓaawo ɗate hulɓingol ɗen e haɓirgol hiila ngol fow nafaali liddu nelaaɗo Allaahu on (s a w) e ɓen gomɗimɓe, on tuma hooreeɓe ghuraysi ɓen ƴetti feere taƴagol Abaa Taalibi, e Banuu Haasim e Muhammadu e wonndiɓɓe makko ɓen, taƴondirgol e nder huuwondire ɗen fow, ɓe winndani ɗun ahadi ɓe wenngi ka Suudu kaaba, ɗun ko ñannde go'o jombente waɗi e nder hitaande jeeɗiɗaɓere gila Nelaaɗo Allaahu on (s a w).

Hino jeyaa ko winndaa e nder ndin ahadi tooñundi ko wonnde: ko wata ɓe soodidu e hay e gooto e banii Haasim wata ɓe resindir e maɓɓe, wata ɓe huuwondir e maɓɓe haa ɓe jonnaɓe Muhammadu ɓe wara mo, ɓe fottani ɗun ɓe waɗi markere e hoore ahadi ndin marke cappanɗe jeetati, ɓaawo ɗun ghuraysi yankooɓe ɓen acci nelaaɗo Allaahu on (s a w) e ɓeynguure maɓɓe nden immorde e banii Haasim e banii Abdul Muttalib ka nder suriire Abuu Taalib, hinde wi'ee kadi (suriire Banuu Haasim).

Wonugol maɓɓe ka nder suriire ɗon duumii haa Nelaaɗo Allaahu on (s a w) e Abuu Taalib huutori jawdi maɓɓe ndin fow, wano tawiri Khadiija kadi nafkii jawdi makko ɗuuɗu ndi ndin fow e nder nden suriire, tampere nden tiiɗi e hoore julɓe ɓen fota, ɓe woni e lettoragol heege e tampere, ɓe woni e ñaamugol puɗiriiji leydi ndin, hari ñaametee hay e huunde alaa e hewtude ɓe ton, si wonaa ko seeɗa e wonunooɓe yurmeede ɓe woni ɓe addande e hoore gunndoo, nden satteende ɗon duumii ko ɓattii duuɓi tati.

Ɓaawo satteende nden e lorra kan arii, julɓe ɓen munñike, ballal Allaahu ngal ari, Allaahu seniiɗo on immini gannguuji ɗi ari ɗi ñaami binndi winndanooɗi ka ahidi ɗin si wonaa ka innde Allaahu seniiɗo on wonunoo ɗon, on tuma Seyyiduna Jibriilu jippii o yewtii ɗun nelaaɗo Allaahu on (s a w).

On tuma Nelaaɗo Allaahu on (s a w) yeetii nden huunde mawnde Abuu Taalibi, ɓe ɓannginani mo ko waɗi e hoore ahadi tooñoori ndin kon, ɓe hucciri ka suudu Allaahu hormanteeru fii yoɓe yeeto ghuraysi yankooɓe tooñooɓe ɓen ko Allaahu seniiɗo on yewti kon, e  fii yoɓe tentinamɓe dalil go'o fii e goongugol Nelaaɗo Allaahu on (s a w).

Abuu Taalibe jooɗii ka dammbugal Kaaba, ghuraysi yankooɓe ɓen fewti mo ɓe wi'i: Ko an yo Abuu Taalib hino waɗɗi maa nde annditataa ahadi ndin, e nde yiɗataa yimɓe ma'a ɓen, accaa fijindaaru e fii ɓiɗɗo siɗɗo ma'a on, o jaabii ɓe: Ko onon yo yimɓe! Addee ko winndu ɗon ahadi mo'on ndin ɗon, si tawii on addii ndi hino gasa en waaway heɓude feere jokkugol enɗan e ccugol taƴondirgol, ɓe addi ka ahadi ndin winndinoo ɗon, Abuu Taalibe wi'i ɓe: ko ɗun ɗoo woni ahadi ndi winnduno ɗon ndin, ɓe wi'i: Ko non woniri, o wi'i ɓe: on tuununii ki ? Ɓe wi'i Men waɗaali. O wi'iɓe: Anndee dey min Muhammadu yewtii lan ittude ka jooma makko, wonnde o imminii ganngu ɗi ñaamii ko winndu ɗon kon si wonaa ka innde Allaahu nden woni ɗon, on yi'ii si tawii ko goonga o wowli ko honɗun waɗo ton? Ɓe wi'i on tuma men accay, o wi'i : Si tawii o fenay mi jonnay on mo, ɓe wi'i : A nunɗii a moƴƴinii.

Saa'iiji sattuɗi ɗin fuɗɗii, e jakale ngannguuji ɗin ñaamii kala ko woni nder ton si wonaa ka innde Allaahu seniiɗo on woni ɗon tun, ɓe townitii ɓe wi'i: Ɗun wonaa hay e huunde nii si wonaa mbilewu.

Heeferɓe ɓen Makka waawaali riiwude on batte mawɗo ɗon, ko woni tun yimɓe ɓen faami, ko heewi e yimɓe naati ka nder diina, ɓe gomɗini Mu'ujiza on, ko tippude e ɗun ahadi bonndi ndin firtaa, Nelaaɗo Allaahu on (s a w) yalti ka nder suriire hiɓe wonndi e yimɓe tedduɓe fooluɓe.

Sincugol dawla barkinaaka kan:

nelaaɗo Allaahu on (s a w) heɓuno feere cincugol dawla ka Madiina (ko ɗun woni leydi e jamaa e heɓugol doole fewjugol).

Ɓe fuɗɗii sincugol dawla kan gila ka ɓe hewtunoo Madiina, ko ɓe adinoo waɗude ko semmbingol konu ngun e nder leydi ndin, e sincugol laawol fewjugol jamaa yanke wol ɓaawo ɗun ɓe fuɗɗii sincugol konu marungu jogoranji piiro, ɗun ko waɗi ko ɓaawo waɗugol ɓe lebbi jeego'o ɗulle ko ɓaawo Allaahu seniiɗo on newnaniiɓe yottagol ɗaɓɓituɗo ɓe, taariika yankooɓe ɓen hino sifii wonnde jihaadiiji ɗi nelaaɗo Allaahu on (s a w) waɗi ɗin ko jihaadiiji cappanɗe jeetati ɗi fow ko dartagol keeferaaku ngun e sirku on e naafighi yaagal ngal.

Waɗugol siɗɗo yaagal hakkunde iwurɓe Makka ɓen (Feruɓe ɓen) e Madiina yankooɓe ɓen (lansaari yankooɓe ɓen).

Nelaaɗo Allaahu on (s a w) noɓe hewtirnoo ka Madiina ɓe fuɗɗino sincugol dawla lisaamu barkinaaka kan, ɓe mahi juulirde nden fii yo nde wonu fottirde fii ɗowugol ngol e mooɓorde fii sincugol dawla kan watta ɗon fii rewugol Allaahu on, ɓaawo ɗun ɓe sinci huuwondiral hakkunde maɓɓe ɓe semmbini daƴƴere jamaa on.

Ñannde sappo e ɗiɗi suumayee ka hitaande aranere fergu barkinaande, nelaaɗo Allaahu on (s a w) siɗɗindiri hakkunde feruɓe iwi Makka ɓen  e ɓe ɓe tawi Madiina ɓen (lansaari yankooɓe ɓen), fillaama wonnde ɓe siɗɗindirno hakkunde Abuu Bakri e Khaarijata geɗal Zeydu, e hakkunde Umar e Utbaan geɗal Maalik, e hakkunde Ma'aaz geɗal Jabal e Abii Zarril Khafaarii, e hakkunde Huzayfatu geɗal Yamaanii e Ammar geɗal Yaasir, e Mus'abu geɗal Amiir e Abuu Ayyuuba, e Salmaana e Abii Dardaa'i.

Ɓaawo Nelaaɗo Allaahu on (s a w) siɗɗindirii hakkunde wonndiɓɓe maɓɓe ɓen, Alii (a s) ari gite makko ɗen hino ɓesa gonɗi o wi'i: ko an yo Nelaaɗo Allaahu ! A siɗɗindirii hakkunde wonndiɓe ma'a ɓen kono a siɗɗindiraali lan hay e gooto? On tuma Nelaaɗo Allaahu on (s a w) (An ko'a siɗɗo an aduna e laakhira).

Abuu Tamaam hino wi'i e nder gimɗi ɗi o yuɓɓi:

Ko siɗɗo makko si tawii o.... e isiraaɓe makko

siɗɗo sifa makko alaa, wonaa isiraaɓe sifa makko.

Ngol siɗɗindirgol ngol Nelaaɗo Allaahu on (s a w) waɗunoo hino jeyanoo e ko ɓuri tiiɗude e politiki lislaamu yankeejo mo Alghur'aana tedduɗo on rerɗini yimɓe ɓen e mu'un, konii Alghur'aana tedduɗo on wi'iri: (إَِّنمَا اْلُمؤْمِنُونَ إِخْوَةٌ) {Anndee gomɗimɓe ɓen ko siɓɓe} suuratul Hujuraati aaya 10.

Jihaadi Badri ɓurunoo ndi mawnude ndin

Ɓaawo nelaaɗo Allaahu on tabitii ka Madiina ɓe fuɗɗii waɗude ɗate konu yankeeje ko honno ɓe liɓirta hoore maakiti nde ghuraysi yankooɓe ɓen yowitinoo e mu'un nden, ka nder ngeygu maɓɓe ka waɗugol ɗatal Nelaaɗo Allaahu on (s a w) yaltidi e yimɓe teemeɗɗe tato e sappo e tato immorde e sahaabaaɓe maɓɓe ɓen fii nanngugol setewol ngeyngu ngol Abuu Sufyaana wonunoo hoore mu'un ngol.

Abuu Sufyaana anndi ko honɗun julɓe ɓen faalaa, o wayli laawol makko ngol, o neli Makka himo ɗaɓɓa faabo e ghuryaysi yankooɓe ɓen, kamɓe e townitaare ngañanaandi ndi ɓe wonndi ndin ɓe ardi e wuluure haɓooɓe, ɓe siini wonnde ɓe yanay e nelaaɗo Allaahu on (s a w) e wonndiɓɓe maɓɓe ɓen e takko woyndu ndiyan wi'etee ndu (ndiyan Badri) hindu woɗɗitii Madiina ko yahata kiloo meeter 160.

Toppitannde Allaahu on tiiɗi e hoore Nelaaɗo Allaahu on (s a w) gila jemma ko adii jihaadi ndin fuɗɗeede ɓaawo o saaƴinno ndiyan tiiɗuɗan julɓe ɓen ɗoyngol heɓiɓe, Nelaaɗo Allaahu on (s a w) neli Ammar geɗal Yaasir e Abdullaahu geɗal Mas'uud e hoore gunndoo fii humpitagol alhaali konu ayɓe ɓen ɓe jinndi ka nder konu maɓɓe ɓaawo ɗun ɓe arti ɓe ari ɓe yeetii nelaaɗo on wonnde ayɓe ɓen hino huli, ɗun ko konngol joomiraaɗo:

( إِذْ يُغْشِيهِمُ النُّعَاسُ أَمَنَةً مِنْهُ وَيُنَّزِلُ عَلَيْكُمْ مِنَ السماء ماء لِيُطَهِّرَكُمْ بِهِ وَيُذْهِبَ عَنكُمُ رِجْزَ الشَّيْطَانِ وَلِيَرْبُطَ عَلَى قُلُوبِكُمْ وَيُثَبِّتَ أَقْدَامَكُمْ * إِذْ يُوحِي رَبُّكَ إِلَى المْلاَئِكَةِ أَنِّي مَعَكُمْ فَثَبِّتُواْ الَّذِينَ آمَنُواْ سَأُلْقِي فِي قُلُوبِ الَّذِينَ كَفَرُواْ الرُّعْبَ).

{Annditee fewno buumirnooɓe ngorre ka holnugol ɓe immorde ka makko, o jippini e hoore mo'on immorde ka asama ndiyan fii yo'o laɓɓinir on ɗan, o itta e mo'on soɓe saytaane ɗen o tiiɗina ɓerɗe mo'on ɗen, o tabintina teppe mo'on ɗen* Fewndo jooma ma'a wahayinnoo e malaa'ikaaɓe ɓen, anndee miɗo wonndi e mo'on, tabintinee ɓen gomɗimɓe, miɗo saatii bugaade kulol ka nder ɓerɗe ɓenyedduɓe}. Suuratul Anfaal aaya 11-12.    

On tuma nelaaɗo Allaahu on (s a w) jonni raaya kan imaamu Alii (a s) ɓe jonni raara feruɓe iwi Makka ɓen Mus'ab Bun Amiir, ɓe jonni raara Khazaji kan Habbaab bunil Munzir, raara Awsu kan Sa'ad Bun Ma'aaz ɓe maaki: Yaa an Allaahu ! Si tawii oo jamaa ɗoo maayii a rewataake ka nder leydi.

Alii (a s) yalti e Waliid bun Saybata o soppi junngo makko ñaamo ngon o taƴi ngo, on tuma Waliid ƴettiri ñaamo mu'un ngon nano ngon o lappiri ngo...Alii, Alii hino wi'i: Mi sikki kammu ngun yanii e hoore leydi ndin, ɓaawo ɗun imaamu Alii (a s) soppi mo kadi wari mo, Hanzala Ibn Abii Sufyaan kadi yaltani mo o soppi mo’o wulli o yani ka leydi, on tuma Aasi bun Sa'iidu wubbi o fotti e Alii (as) Alii wari mo, Nelaaɗo Allaahu on (s a w) lanndii ko hommbo anndi fii Nawfal bun Khuwaylid, Alii (a s) jaabii nelaaɗo Allaahu on (s a w) mi warii mo, nelaaɗo Allaahu on ( s a w) habbiri ɓe maaki: Yettoore woodanii Allaahu on jaabinanɗo lan du'aa an e makko.

Fillaama wonnde Nelaaɗo Allaahu on (s a w) ƴettuno njaareendi bugii ndi ayɓe ɓen ɓe maaki: .. Yaa an Allaahu! Hulɓin ɓerɗe maɓɓe ɗen, dillinaa teppe maɓɓe ɗen, yimɓe sirku ɓen foolaa, julɓe ɓen jokkitiɓe wariɓe nanngi ɓe, ko ndin jihaadi waɗunoo ko ñannde sappo e jeeɗiɗi suumayee e nder hitaande ɗiɗaɓere fergu nden, ko nii Allaahu seniiɗo on okkiri julɓe ɓen polgal e nder ndin jihaadi ɗon, ghuraysi yankooɓe ɓen foolaa ɓe lancitii, innde maɓɓe nden e ko ɓe huletenoo kon boni, wano tawiri julɓe ɓen heɓuno ɗon jawle konu yankeeje e finnde yankooje ɓe kurkanii diina lislaamu kan e fempugol tugaale makka on ɓe waɗii waylannde mawnde e nder seeɗa e batteeji ka nder suriire aarabeeɓe ɓen.

Jihaadi ndin Uhudi

Ñannde sappo e jowi juldaandu ka hitaande tataɓere fergu, jihaadi ndin Uhudi waɗi, uhudi ko fello woɗɗitii ngo Madiina yeru maylu ɗiɗi maa tati.

Nde tawunoo non battane jihaadi ndin badri hino satti e hoore yimɓe sirku ɓen Makka, ɓe ghirritantaake hay e huunde haa ɓe yottanoo teddungal maɓɓe ngal e ɓen waraaɓe immorde e tedduɓe maɓɓe ɓen ɓe woni e eɓɓindanagol haɓugol julɓe ɓen, ɓe eɓɓindii fii yottagol e ittugol wirtere.

Ghuraysi yankooɓe ɓe yaltidi e guluuji tato haɓooɓe ko Abuu Sufyaana woni ɗowuɗo ɓe on ɓe fewtiri ka Madiina, Nelaaɗo Allaahu on eɓɓindii kamɓe e wonndiɓɓe maɓɓe ɓen ɓe moƴƴini saffeeji ɗin ɓe jonni raaya kan amiiral Muumuniina Imaamu Alii (a) ɓe waɗi fampotooɓe buy ɓaawo konu ngun ɓe yamiriɓe yoɓe wonu ka ɓe wi'aa ɗon, hara ɓe accitaali ɗon ɓe yaha nokku go'o kamɓe Nelaaɗo Allaaho on (s a w) ɓe tentinani ɓe ɗun, hay fillaama wonnde ɓe wasiyino ɓe nde ɓe wonata e nokku maɓɓe wata ɓe iwu ɗon few hay si tawii julɓe ɓen foolii maa ɓe foolaama.

Jihaadi ndin fuɗɗii hakkunde julɓe ɓen e yedduɓe ɓen, Talhata bun Abii Talha haaci ko kanko joginoo raaya heeferɓe ɓen? Ko hommbo yaltata ? Imaamu Alii (a s) yaltani mo, soppi mo ka tumbere hoore o maayi, on tuma siɗɗo makko on ƴetti raara heeferɓe ɓen tawi rewɓe ɓen hino ɓaawo makko hiɓe reɗina mo tappa taba, o ari fewndo Hamza bappa Nelaaɗo Allaahu on (s a w) o soppi ɓe soppannde wootere nde hewti ka jope ɓe maayi.

Hino e nder deftere wi'eteende irsaadul Mufiid: Wonnde hari joginooɓe raayaaji ɗin ñannde jihaadi ndin Uhudi ko ɓe njeenayo Alii (a s) waruno ɓe ɓe fow nden ñannde, hino e nder deftere taariika Tabarii, ɓaawo joginooɓe raayaaji heeferɓe ɓen waraama feeñanno heeferɓe ɓen wonnde ɓe foolaama saffeeji maɓɓe ɗin lancii, rewɓe maɓɓe ɓen woni e noddugol halkaare ɓaawo nde ɓe weltinoo ɓe piyi dunndu.

Waaghidii hino wi'i: Ɓaawo heeferɓe ɓen foolaama julɓe ɓen jokkitayno ɓe soppa ɓe kala kaɓe faalaa haa ɓe yaltiniɓe e nder ka wonaa e haɓeede ɗon ɓe woni e mooɓugol jawle, ɓaawo fampotooɓe ɓen yi'ii ɓe(ɓen ɓe nelaaɗo Allaahu on (s a w) yamirnoo wata sottu e nokkure ka woni ɗon) woɓɓe maɓɓe wi'i woɓɓe: Hannde kadi ko honɗun wonan ton ɗoo ko aldaa e huunde, Allaahu on foolii ayɓe ɓen, e hino siɓɓe mo'o ɓen hino mooɓude jawle ɗen, yahee mooɓidon e maɓɓe, woɓɓe e maɓɓe wi'i: On anndaa wonnde Nelaaɗo Allaahu on (s a w) wi'uno on wonee ɓaawo amen hay si tawii men mooɓii jawdi ndin wata on tawtu men, woɓɓe e maɓɓe wi'i : wonaa ɗun Nelaaɗo Allaahu on ( s aw ) faalanoo wi'ude, ka sakkitoode ɓe yahi jihaadi ndin waɗi ton ɓe woni e mooɓugol jawle ɓe sotti e nokkeeli maɓɓe ɗin ka hoore fello, ɓaawo Khaalid Bun waliid tawii ɓe sottii e nokkeeli maɓɓe ɗin o dogi o yaadi e pucci ɗin ka fampotooɓe ɓen wonunoo ɗon ɓe yani e maɓɓe ɓe bigii ɓe ndaga haa ɓe fiɗi ɓe.

Ɓaawo heeferɓe ɓen tawii pucci maɓɓe ɗin hino haɓude ɓe yiltitii ɓe ari ɓe taƴiti yeeso julɓe ɓen tawi hiɓe mooɓude jawle ɗen, julɓe ɓen woni hakkunde didol ngol ɓe woni e soppindirgol hakkunde maɓɓe hakkee ko ɓe hawji ! Wonndiɓe nelaaɗo on (s a w) dogi acci ɓe, heeferɓe ɓen woni e yanugol e maɓɓe hiɓe faalaa warude ɓe, Ibnu Asiir hino wi'i fii ɗun : Nelaaɗo Allaahu on (s a w) haɓuno ñannde jihaadi ndin Uhudi hawre tiiɗunde ɓe fampino ndaga haa ɗe lanni laañal maɓɓe ngal heli ɓoggol maggal on taƴi. Hino ka nder fillayee seykhul Mufiid kinal maɓɓe ngal seekano ñiiƴe maɓɓe leyleeje ɗen ittaa ƴiiƴan ili ka yeeso maɓɓe teddu ngo.

Sahinndineede Hamza (a s)

Hinndu ɓiɗɗo Utbata on (ɓeyngu Abuu Sufyaana) wi'i Wahsii: Si tawii a waawii warugol Muhammadu maa Alii (a s) maa Hamza Bun Abdul Muttalib, miɗo saatii jonnugol ma dokkal mawngal, o fodi mo wonnde o waray Hamza.

Wahsii hino wi'i: Mi woondirii Allaahu on miɗo reeni Hamza hino soppira yimɓe ɓen kaafa makko kan o bugotaako ka goɗɗo o ka feƴƴa mo si wonaa o wara on tigi on tuma mi darni ko mi woni e haɓude kon mi fampii mo o yaniti e hoore buse makko ɗen haa mi yaltii hakkunde koyɗe makko ɗen o yani, mi sabbitii mo haa o maayi, mi ƴetti ko mi haɓirta kon mi yalti e nder hare ɗen.

Fillaama wonnde Hinndu yanuno e sahinndinaa ɓe ɓen ɓaawo o hewtii ka Hamza waalii ɗon o seekuno reedu makko ndun o yaltini ɓernde makko nden, o ñaami nde, kono o waawaano moɗude nde ɗeɗɗi mo, ɓaawo ɗun o taƴi kinal makko ngal o waɗi ɗun ka junngo makko a sikkay ko mullo e koɗol ka daande makko.

Ɓaawo Nelaaɗo Allaahu on (s a w) artii ka Madiina kamɓe e wonndiɓɓe maɓɓe ɓen, Faatimatu Zahraa jaɓɓino ɓe, tawi hiɓe jogii miran hun ndiyan no e nder makkun o looti yeeso maɓɓe ngon, Alii hewtitiiɓe tawi ƴiiyan ɗan hino dolii gila ka junngo makko haa ka balaaje makko tawi himo wakkii kaafa makko wi'eteeka zul fighaar kan o jonnika Faatima o wi'i mo: Jaɓu kaa kaafa ka goonginii lan, Nelaaɗo Allaahu on (s a w) wi'i mo (Faatima) : Ko an yo Faatima jaɓu kaafa kan moodi ma'a tottii ko fawii e hoore makko kon, Allaahu on waririi kaafa makko kan hooreeɓe ghuraysi ɓen.

Jihaadi ndin Khanndagh

Ɓaawo banii ghurayzata firtii ahadi ko ɓe sulhondirnoo e nelaaɗo Allaahu on (s a w) ɓe wattii e saffeeji heeferɓe ɓen, doole ayɓe julɓe ɓen ɓeydii ɓe immini ka madiina guluuji sappo haɓooɓe, ɗun addi yo kulol saako hakkunde julɓe ɓen, wonkiiji maɓɓe ɗin dilli, alaa ko ɓe sikkaali.

Ayɓe ɓey fuɗɗii yanugol e julɓe ɓen ɓe diwi joolol asanoo ngol ngol –ngol nelaaɗo Allaahu on (s a w) e wonndiɓɓe maɓɓe ɓen asunoo ngol – tawi ko woni hoore ɗun ko gooto e hooreeɓe sirku ngun e keeferaaku ngun ko woni innde makko ko: Amru Bun Abdu wuddul Aamirii, kulol ngol ɓurti ɓeydaade e julɓe ɓen, sabu gaño on hino hulɓinnde ɓe ka nder tataaji maɓɓe.

Abdu Wuddu woni e haylagol ñaaƴoo mantora doole makko ɗen, o nodda o lanndoo: hiɗon mari piiriday ɗo e an? Alii immii, o wi'i: Min mi piiriday e makko yo Nelaaɗo Allaahu! Nelaaɗo Allaahu newnani mo, ɓe jonni mo kaafa maɓɓe wi'eteeka Zul fighaar kan, ɓe watti mo bolojan maɓɓe on ɓe taarani mo meetelol maɓɓe ngol .

On tuma Nelaaɗo Allaahu on (s a w) maaki: Yaa an Allaahu! O ko siɗɗo an on nii, ko'o ɓiɗɗo bappa an, wata a accan ko mi bajjo, ko an ɓuri moƴƴude ronooɓe ɓen) Alii (a s) yahi ka fottirde, o noddi Ibnu Abdil wuddi o wi'i: Ko an yo Amru ! Hari a ahodii e Allaahu on, wonnde gorko e ghuraysi yankooɓe ɓen noddataa ma e gooto e piiji ɗiɗi si wonaa a jaɓay ɗun, Amru wi'i : Ɗun ko non woniri, Alii wi'i mo: Miɗo noddude ma ka Allaahu on e ka Nelaaɗo makko on e ka lislaamu, o jaabii : Mi maraa haaju e ɗun, imaamu on maaki: Mi noddii ma yo en piiru, Amru wi'i: Miɗo añi hibbugol ƴiiƴan ma'a ɗan hari baaba en ma'a ko weldiɗɗo an.

Imaamu Alii jaabii mo wi'i: Kono min mi woondirii Allaahu on miɗo faalamaa hawude ma, Amru monii fuɗɗii hawre nden e hoore imaamu Alii (s a), on tuma imaamu on wari mo, habbiraaɗi ɗin e sintiraaɗi ɗin ɗuuɗi e nder saffeeji julɓe ɓen, ɗun ko ñannde tati juldaandu hitaande jowaɓere fergu waɗi, ɓaawo imaamu on artii ko ɓe fooluɓe, nelaaɗo Allaahu on (s a w) jaɓɓii ɓe, tawi hiɓe maaka: {Mi woondii Allaahu on ko haɓugol Alii e Abdu Wuddu, ɓuri moƴƴude golle mofte an ɗen haa ñannde darngal.

Si wonaano wakkilaare imaamu Alii nden nden ñannde konu heeferɓe ɓen ommbitayno Madiina on e hoore julɓe ɓen, wonnde kala hari juɓe ɓen hino ɗuuɗi fota, wakkilaare Alii nden ko nii wonirnoo e nder jihaadi ndin khandagh (Al Ahzaab) ɗun hino jeyanoo e ko ɓuri himmude e ko Allaahu on walli liimaanu ngun e hoore keeferaaku ngun.

Udditugol Khaybara

Hari ahadi alaa hakkunde nelaaɗo Allaahu on (s a w) e aluyahuudi yankooɓe ɓen khaybara, asku Banii Ghaynaghaa'a e Nadiir e Ghurayza, hari ahadi hino hakkunde maɓɓe e Nelaaɗo Allaahu on (s a w)..ko ɗun firi ko wonnde Nelaaɗo Allaahu on (s a w) yahuno noddi ɓe ka diina lislaamu maa ɓe itta duuti, maa nelaaɗo Allaahu on (s a w) haɓaɓe, ɓaawo ɓe jaɓaali silmude ɓe ittaali duuti nelaaɗo Allaahu on (s a w) haɓiɓe.

Hari alyahuudi yankeeɓe ɓen Khaybara hino wallondirde e Alyahuudi yankooɓe ɓen Khitfaan e hoore nelaaɗo Allaahu on (s a w), ko ɗun wonunoo sabu haa nelaaɗo Allaahu on yaltani ɓe.

Ibnu Asiir e ko wonaa kanko jantike wonnde hari alyahuudi yankooɓe ɓen khaybara hino wallondirde e hoore nelaaɗo Allaahu on (s a w) e wonnde Khitfaan yahuno khaybara fii wallugol alyahuudi yankeeɓe ɓen.. ɓaawo ɗun ɓe huli julɓe ɓen e hoore ɓeynguureeji maɓɓe ɗin e jawle maɓɓe ɗen ɓe yiltii.

E nder ndin jihaadi ɗon hari julɓe ɓen ko ɓe wuluure e teemeɗɗe nayo hari hiɓe mari waɗɗeteeɗi teemeɗɗe ɗiɗi, ɓaawo ɓe hewtii ka ɓe weeri ɗon ɓe memminaaki haa weeti naange ngen fuɗi, ɓaawo alyahuudi yankooɓe ɓen ɓe udditi tataaji maɓɓe ɗin ɓe fokkiti ka golleeji maɓɓe, ɓaawo ɓe ndaarii ɓe yi'i Nelaaɗo Allaahu on (s a w) ɓe wi'i: ko Muhammadu e konu makko ngun, ɓe dogi ɓe naati ka nder tataaji maɓɓe, Nelaaɗo Allaahu on (s a w) maaki : Allaahu Akbar, Khaybara boniino, menen si tawii men jippike e tannde yimɓe haray bimbi waajaaɓe salii bonii, ɓe huuɓiɓe ko yahata balɗe sappo, ko woni tata adinooɗo udditaade ko tata: Naa'im, ɓaawo ɗun tata Ghamuus on, hikki ɗon tata Sa'ab Bun Ma'aaz, hikki ɗon tata Satiim e Salaalim, ko sakkitanoo udditeede ko tata Khaybara on.

Ka khaybara nelaaɗo Allaahu on neluno Abuu Bakri jonni mo raaya kan, hari ko daneha, ɓe humani mo, uddital waɗaali.., bimbi mu'un ɓe immindini Umar Bun Khattaab e raaya kan ɓe haɓɓani mo kanko kadi himo wonndi e yimɓe neeɓaali o foolaa kanko e yimɓe makko ɓen, ɓe ari ɓe wi'i mo himo huli reedu o wi'i hiɓe huli reedu, jamaa alyahuudi yankooɓe ɓen yalti tawi hino e yeeso maɓɓe Yaasir maa Naasir maa Marhab lansaari yankooɓe ɓen yiltitii haa tawoyi nelaaɗo Allaahu on, ɗun satti e Nelaaɗo Allaahu on (s a w) ɓe maaki : Maa mi nela janngo gorko yiɗuɗo Allaahu on e nelaaɗo makko on, mo kamɓe ɗiɗo ɓe yiɗi, o dogataa, Allaahu on udditoyay e juuɗe makko, daaɗe ɗen pooɗaa fii yo ɗe ndaaru ko hommbo jonnetee raaya kan janngo, ghuraysi yankooɓe ɓen mo bee yelii nde tawata ko kañun jonnetee raaya kan janngo, hari Alii hino ñaabaa, ñaabaaje sattuɗe, ɓe noddi mo, ɓe wi'i nelaaɗo Allaahu on gite makko ɗen hino muusa, ɓaawo imaamu Alii (s a) arii nelaaɗo Allaahu on ƴetti e tuutaaɗe kara maɓɓe on ɓe wuji ka gite makko ɗe ɓutti, a sikkay hari ɗe alaa e muusude ɓe maaki; Yaa an Allaahu! Danndu mo nguli e ɓuuɓol, hay nde wootere o wulitaaki gite makko ɗen, wonaa ɓuuɓol wonaa nguli poomaa, ɓe jonni mo raaya kan ɓe maakani mo: Yahu haɓaa wata a yeƴƴito haa Allaahu on uddita e juuɗe ma'a, Alii wi'i : Ko an yo Nelaaɗo Allaahu ! Ko e hoore honɗun mi haɓirta ɓe? Nelaaɗo Allaahu on (s a w) maaki: Haɓuɓe fii yoɓe seedo wonnde reweteeɗo alaa e hoore goonga si wonaa Allaahu on, e wonnde min ko mi nelaaɗo Allaahu, si tawii ɓe waɗii ɗun haray ɓe danndii lan ƴiiƴan maɓɓe ɗan e jawdi maɓɓe ndin si wonaa hara ko'e hagghee makko, ñaawoore maɓɓe nden ko ka Allaahu seniiɗo on.

Salmata wi'i: Nelaaɗo Allaahu on (s a w) yalti hino wi'ude (laa hawla walaa ghuwwata illaa billaahi) miɗi iwtiri ɓaawo maɓɓe haa o waɗi raaya kan ka binnde tata, alyahuudi yankeejo yi'i mo ka hoore tata, o wi'i mo: ko an hommbo nii ? O wi'i (a s) : ko min Alii Ibn Abii Taalib.

Alyahuudi yankeejo on wi'i: On foolii kaa on foolaama.

yimɓe tata on yalti, ko adinoo yaltude e maɓɓe ko Haaris- siɗɗo Marhab on- hari ko'o gorko suusuɗo reedu lollirɗo cuucal, julɓe ɓen woncitii, Alii darii ɓe piiri, Alii (a s) wari mo, alyahuudi yankeeɓe ɓen foolaa ɓe naatoyi ka nder tata, Ɓaawo Marhab anndii siɗɗo makko on waraama o jippii heña himo wattii dollokaaji njanndi ɗiɗi wakkii kaaf makko kan taari meetelol makko ngol ɓornii e hoore makko kunnawal njanndi, yahi wallugol mo tawi himo jogii conkewlal ɗenngal maggal on ko cuɓanɗe tati, himo diwna wi'a:

Khaybara anndii ko min wi'etee Marhabu

jogiiɗo jogoran koohoojo ndarndaaɗo

mi cukkay tuma goo, mi piya tuma goo...

Alii (a s) jaabii mo:

Ko min yumma an inni : Haydara

Mi etiray on kaafa  

ko woni haydara ka ɗenngal aarabeeɓe ɓen ko: gooto inɗe ñaɓii.

Ñannde huɗondirgol ngon:

Ɗun ko konngol joomiraaɗo seniiɗo on:

(فَمَنْ حَآجَّكَ فِيهِ مِن بَعْدِ مَا جاءك مِنَ الْعِلْمِ فَقُلْ تَعَالَواْ نَدْعُ أَبْنَاءَنَا وَأَبْنَاءَكُمْ ونساءكم وَنِسَاءَنَا ونساءكم وَأَنْفُسَنَا وَأَنْفُسَكُمْ ثَمَّ نَبْتَهِلْ فَنَجْعَلُ لَعْنَةَ اللَّهِ عَلَى الْكَاذِبِينَ).

{Kala wennjuɗo ma e alghur'aana on, ɓaawo huunde ko arumaa e ganndal, maaku yo Nelaaɗo:  Aree nodden ɓiɓɓe amen ɓen e ɓiɓɓe mo'on ɓen, sonnaaɓe amen ɓen e sonnaaɓe mo’on ɓen e wonkiiji amen ɗin e wonkiiji mo’on ɗin ɓaawo ɗun huɗen waɗen kuddi Allaahu on ndin e hoore fenooɓe ɓen}. Suuratu Aali Imraan aaya 61.

Nelaaɗo Allaahu on winnduno e yimɓe Najraana ɓen hiɓe nodda ɓe ka nder diina lislaamu {ko adii kon, miɗo nodda on e rewugol Allaahu on iwon e rewugol yimɓe, miɗo nodda on ka laamu Allaahu on hara wonaa laamu yimɓe ɓen, si tawii on salike haray on newnanii lan haɓidugol e mo'on wassalaam}.

Ɓaawo hooreejo Kretiyen ɓen ɓen janngii kaydi ndin, o ɗenƴii o huli fota, o immini nelal haa e gorko e yimɓe Najraana ɓen wi'etenooɗo (Surayhabiil Bun wadaa'a) o jonni mo kaydi nelaaɗo Allaahu on (s a w) o janngi ndi, hooreejo kretiyemɓe ɓen wi'i: ko honɗun woni feere ma'a e ɗun? Surayhabiil jaabii mo: Hiɗa anndi ko Allaahu on fodunoo annabi Ibraahiima kon e nder jurriyya Ismaa'iila fii annabaaku ngun, hino waawi wonude wonnde oo ko annabaajo, mi maraa feere e annabaaku ngun, si tawno huunde e nder piiji aduna yankeeji ɗin mi naatayno e mu'un, mi wakkilono fii ma'a, hooreejo kretiyen on naɓiri kaydi e gooto kala e yimɓe najraana ɓen, o yewtidi e maɓɓe, o jaabii sifa jaabawol Surayhabiilu ngol, ɓe fotti e feere yo Surayhabiil e Abdullaahi ɓiɗɗo makko on e Habbaar Bun Ghans yahamɓe ɓe addanaɓe khabaru fii nelaaɗo Allaahu on (s a w) ɓe yahi haa ɓe tawi nelaaɗo Allaahu on (s a w) ɓe lanndii mo, kanko kadi o lanndiiɓe, ɓe seedaali hiɓe lanndondira haa ɓe wi'i: Ko honɗun wi'uɗaa e fii Annabi Iisaa? Nelaaɗo Allaahu on (s a w) jaabiiɓe: Ko'o jiyaaɗo Allaahu, sifa ngol ɗoo jaabawol ghalɗinay feƴƴintimɓe fii annabi Iisaa ɓen, ɓaawo kamɓe hiɓe felliti ko'o ɓiɗɗo Allaahu, wi'ugol ɗun jeyaa ɗun e waɗugol mo rewteeɗo, ko woni sabu ɓe wi'ude ɗun ko ɓaawo Annabi Iisaa daña o maraa baaba, on tuma ɓe wi'i ko'o ɓiɗɗo Allaahu on.

Oo aaya ɗoo jippii:

(فَمَنْ حَآجَّكَ فِيهِ مِن بَعْدِ مَا جاءك مِنَ الْعِلْمِ فَقُلْ تَعَالَواْ نَدْعُ أَبْنَاءَنَا وَأَبْنَاءَكُمْ ونساءكم وَنِسَاءَنَا ونساءكم وَأَنْفُسَنَا وَأَنْفُسَكُمْ ثَمَّ نَبْتَهِلْ فَنَجْعَلُ لَعْنَةَ اللَّهِ عَلَى الْكَاذِبِينَ).

{Kala wennjuɗo ma e alghur'aana on, ɓaawo huunde ko arumaa e ganndal, maaku yo Nelaaɗo:  Aree nodden ɓiɓɓe amen ɓen e ɓiɓɓe mo'on ɓen, sonnaaɓe amen ɓen e sonnaaɓe mo’on ɓen e wonkiiji amen ɗin e wonkiiji mo’on ɗin ɓaawo ɗun huɗen waɗen kuddi Allaahu on ndin e hoore fenooɓe ɓen}. Suuratu Aali Imraan aaya 61.

Ko'o wonnduɗo e jaabawol timmungol ngol aldaa e sikke fii iwtirɓe ɓaawo annabi iisaa ɓen, e nder on saa'i ɗon tigi aaya on ko addanɗo ɓe nelaaɗo Allaahu on waɗunoo ka ley suddaare ɓen, ɓaawo aaya on hino wi'i ka yewtugol fii Alii(أنفسنا)  o wi'i fii Faatima (نساءنا) fii imaam Alhasana e Alhusaynu  (بناءنا)ɗun ɗoo hino tinndini ko ɓee ɗoo hartornoo e nelal ngal kon, aaya on kadi ko noddaandu toowundi fii huɗondirgol e yimɓe fenooɓe fenñimɓe fenaande mu'un nden e nder huunde ko yowitii e fii annabi Iisaa, nelaaɗo Allaahu on (s a w) noddiɓe e tummbondiral mo bee e maɓɓe yo addu ɓe ɓuri hoolorde ɓen, fii yo fow huɗondir e nder du'aa mo woopataa, kuddi Allaahu ndin jippoo e hoore fenooɓe ɓen.

Nelaaɗo Allaahu on (s a w) yalti tawi hiɓe wattii concol ngol leeɓi ɓaleeji hari hiɓe sekkii Alhusayna hiɓe jogii Alhasana ka sookeewo maɓɓe, tawi neene Faatimatu Zahraa hino iwtiri ɓaawo maɓɓe, tawi Alii hino ɓaawo neene Faatimatu Zahraa, tawii nelaaɗo Allaahu on (s a w) hino maaka : Si tawii mi du'ike amminee, on tuma hooreejo kretiyemɓe ɓen Najraana wi'i: Hey ko onon yo Annasaarankooɓe! Miɗo reeniɗoo geece si tawii ɗe torike Allaahu on nde'o ittata fello e nokku maggo o ittayno ngo sabu majje, wata on jaɓu huɗondireede halko ɗon, on tuma heddotaako e annasaarankooɓe ɓen hay e gooto haa ñannde darngal.

Ɓe wi'i : ko an yo Abal Khaasim! Men taw wata men huɗondir e ma'a yo men ghirrito diina ma'a kan, Nelaaɗo Allaahu on (s a w) maaki: Si tawii on jaɓaali huɗondirgol ngol haray silmee, kala ko woodani julɓe ɓen woodana on, kala ko fawii julɓe ɓen fawoo on, ɓe salii, nelaaɗo Allaahu on (s a w) maaki: Bee mi siina hare e hoore mo'on,ɓe wi'i : Men maraa doole haɓudugol e aarabu, kono men moƴƴinay hakkunde me'en wonnde wata on haɓu men e wata on yaltin men ka nder diina amen sari nde men jonnata on e nder hitaande bee guluuji ɗiɗi hulla, men jonna on wuluure e nder lewru sabbordu paran, wuluure e nder lewru raaji ndun, e dolokkaaji cappanɗe tati njanndi, nelaaɗo Allaahu on (s a w) jaɓani ɓe ɗun ɓe maaki: Mi woondirii on mo wonkii an woni e juuɗe mu'un hari halkaare nden feeñii e hoore yimɓe Najraana ɓen si tawno ɓe jaɓuno huɗondireede ɓe halketeno ɓe wattee kerooji e girayɗi, aynde nden huɓɓayno e hoore maɓɓe yiite, Allaahu on mehayno leydi Najraana e yimɓe mayri on hay colli ɗin ka hoore leɗɗe, hitaande hewtitataano e Annasaaraa haa ɓe fow ɓe halkoo.

Ko faandaa e wi'ul maɓɓe (wuluure e nder sabbordu paran) ko e jommbente woni ko ɓe faandii ɓaawo ko'e ndun lewru ɗon hitaande ka aarabeeɓe ɓen. Hari e nder jamaanu majjiyanko hindu wi'ee (safar) ɓe wi'a safar arnuru e safaru ɗiɗaɓuru, hari aarabeeɓe ɓen hino fuɗɗoo limude e nder lewru safar aranuru ndun, ɓaawo ɗun lislaamu on ghirritii horma mayru on e nder safar aranuru ndun ndu ɓe wi'iraa nii Muharram Al Haraam (Jommbente).

Sulhul hudaybiyya on:

Nelaaɗo Allaahu on (s a w) ƴettiino feere wonnde ɓe yahiday e wonndiɓe maɓɓe ɓen gila Madiina Munawwara haa Makka, fii yo ɓe juuro suudu Allaahu hormanteeru ndun, ɓaawo nde ɓe yi'unoo e nder koyɗol wonnde ɓe naatoyay Makka kamɓe e wonndiɓɓe maɓɓe ɓen hara ko ɓe hooliiɓe ko aldaa e hare, wano ɗun ariri ka nden deftere Allaahu teddunde:

(لَقَدْ صَدَقَ اللّّهُ رَسُولَهُ الرُّؤْيَا بِالحَْقِّ لَتَدْخُلَّنَ المَْسْجِدِ الحَْرَامِ إِنْ شَاءَ الله آمِنِينَ مُحَلِّقِينَ رُؤُوسَكُمْ وَمُقَصِّرِينَ لاَ تَخَافُونَ فَعَلِمَ مَا لَمْ تَعْلَمُواْ فَجَعَلَ مِنْ دُونِ ذَلِكَ فَتْحًا قَرِيباً).

{Gomɗii Allaahu on goonginii koyɗol nelaaɗo makko on e hoore goonga, maa naatoyon ka juulirde hormanteere si Allaahu on jaɓii hara ko'on hooliiɓe fembuɓe ko'e mo'on ɗen hara ko'on ɗuytuɓe julde, on hulataa, o anndii huunde ko'on anndaali, o waɗi gaanin ɗun uddital ɓattii ngal}.

Nelaaɗo Allaahu on (s a w) fewtiri Makka, hiɓe wonndi e ko ɓattii wuluure e teemeɗɗenayo immorde e muhaajiriina e lansaari yankooɓe ɓen, ɗun ko waɗi ko ñannde go'o sabbordu donkin e nder hitaande jeegaɓere fergu, ɓe ɗowi neemoraaɗi cappanɗe jeeɗiɗi ko ɓe layyoo ka Makka, ɓaawo on khabaru hewtii ghuraysi yankooɓe ɓen ɓe ɗenƴii ɓe sikki wonnde Nelaaɗo Allaahu on (s a w) faala yanude e maɓɓe, ɓe woni e janngugol alhaaliiji ɗin ɓe eɓɓindanii sakkagol Nelaaɗo Allaahu on (s a w) e Suudu hormanteeru ndun.

Ɓaawa khabaru eɓɓindagol ghuraysi yankooɓe ɓen hewtii nelaaɗo Allaahu on (s a w), ɓe wattiti laawol maɓɓe ngol, ɓe rewi e laawol go'o, hara wonaa laawol ngol ghuraysi yankooɓe faalaaɓe haɓude ɓe ɓen, on tuma ɓe habbitii ka nder aynde Hudaybiyya ɗon, ɓe neli e maɓɓe gorko jeyaaɗo e gorol wi'etee ngol Khuzaa'at fii anndingol ɓe ko fii honɗun addi nelaaɗo Allaahu on, ko woni ɗun ko wonnde ko addiɓe ko juuragol suudu Kaaba ndun, ka ɓattagol Allaahu seniiɗo on fii yottingol noddaandu maɓɓe ndun, si tawii ɓe salike ɗun ɓe piiriday e maɓɓe haa ka ɓe fooli woo.

Ɓaawo ghuraysi yankooɓe ɓen yi'ii doole nelaaɗo Allaahu on (s a w) e feŋagol ɓe e ko ɓe faalaa kon, e hino hiɓe anndi lo'ere ko ɓe wonndi kon fewndo on tuma, ɓe waawataa dartaade nelaaɗo Allaahu on (s a w), yewtere nden fuɗɗii fottaa yo sulhhondire, Nelaaɗo Allaahu on (s a w) noddi imaamu Ali (a s) yo’o winndu toɓɓe fottaaɗe fii mu'un ɗen wano woniri ardude nii:

1-Accugol haɓugol ngol emmbere duuɓi sappo.

2-Kala faalaaɗo naatude ka ahadi Nelaaɗo Allaahu on (s a w) o waɗay, kala faalaaɗo naatude e ahadi ghuraysi yankooɓe ɓen yo'o naatu.

3-Nde tawata lislaamu on hino feeñi Makka, hay e gooto karhataake e hoore diina makko kan, o lorrataake, o aybintaake.

4-Nde Nelaaɗo Allaahu on (s a w) hootata ka iwri ton e nder ndee ɗoo hitaande, ɓaawo ɗun ɓe artoya e hitaande araynde nden, hara ɓe ardaali e jogornji haɓugol. Yoga e julɓe ɓen battinori yoga e toɓɓe yewtaaɗe ka fuɗɗoode ɗen, ɓe sikki wonnde hayrugol heɓii ɓe, ɓe woni e fenñingol ɗenƴere maɓɓe nden e ŋalaw maɓɓe on, kono ɓaawo hitaannde nden arii, tawi wonaa koɓe sikkaynoo kon, battane moƴƴo sulhu on woni e feeñugol, ndaɗɗana walylitannde mawnde, on tuma julɓe ɓen fuɗɗii faamude nafa pottal ngal, ngal golmbugal sonfanɗe ayɓe ghurysi yankooɓe ɓen, ɗun udditani noddaandu lislaamu ndun seekugol ɗatal hakkunde saffeeji gori aarabeeɓe ɓen, yimɓe ɓen woni e naatugol ka nder diina lislaamu, yimɓe foyngiɗinanooɓe sabu diina maɓɓe kan hoolii, ɓe fenñini diina maɓɓe kan, Allaahu on newinani nelaaɗo makko on naatugol Makka, e waɗugol Umra maɓɓe on, e nder hitaande araynde nden. Ka lannoode Alghur'aana on sifike on sulhu wonnde ko'o uddital e nder yoga e aayeeje makko, pellet ko kanko wonunoo ndaɗanɗo udditugol mawngol ngol Makka ka nder hitaande jeetata ɓere.

Udditugol Makka ngol

Battaneeji sulhu hudaybiyya waɗunooɗo hakkunde nelaaɗo Allaahu on (s a w) e ghuraysi yankooɓe ɓen ka nder hitaande jeegaɓere fergu woni e feeñude e nafa Nelaaɗo Allaahu on (s a w), gorol wi'etee ngol Khuzaa'ata ngol wattii e konu nelaaɗo Allaahu on (s a w) gorol kinaana ngol wattii e ghuraysi yankooɓe ɓen, fenndo sulhu on waɗi feddeeji ɗiɗi liddondirɗi feeñi.

Allaahu seniiɗo on muuyii nde sabuuji ballal mawngal ngal e uddital feeñungal ngal eɓɓotoo, wennje ɗen yana hakkunde gorol kinaanata ngol e gorol Khuzaa'ata ngol, gorol aranol ngol yahi e gorol ɗiɗaɓol ngol, ghuraysi yankooɓe ɓen wattii e gorol Kinaana ngol, ɓaawo Abuu Sufyaana wallii gorol kinaana ngol o so'i bone ɗun fota, o ɓittori yahugol ka nelaaɗo Allaahu on (s a w) fii yewtidugol e nelaaɗo Allaahu on (s a w) kono nelaaɗo on jaabaaki mo hay e huunde, o ɗaɓɓiri wonndiɓe maɓɓe e ɓeynguure suudu maɓɓe ndun yo tefan mo, o yiltii makka ko'o hoyɗo, Nelaaɗo Allaahu on (s a w) woni e eɓɓindanagol haɓugol heeferɓe Makka ɓen haa haɓooɓe ɓen hewti guluuji sappo haɓooɓe, hari nelaaɗo Allaahu on (s a w) hino eɓɓude fii wata hare ɗen waɗu ka nder Makka, ɓaawo Makko ko nokkuure Allaahu hormanteere, ñannde 2 Suumayee ka hitaande sappaɓere fergu (e nder fillayee) Nelaaɗo Allaahu on (s a w) fewtiri Makka kamɓe e konu maɓɓe ngun ɓe saakiti ngu huɓɓa giiteeli ka nder njaareedi saharaa ka woɗɗaaki Makka, ɗun naadi kulol e nder ɓerɗe bewɓe ɓen hino e hoore maɓɓe Abuu Sufyaana.

Ka sakkitoode Abuu Sufyaana jebbilanii Nelaaɗo Allaahu on (s a w) o ari ka maɓɓe o seeditii  Sahaadaaji ɗin ɗiɗi kulol, Annabiijo on yamiri Abbaasi bun Abdul Muttalib yo'o darodu e Abuu Sufyaana ka konu Allaahu ngun rewata ɗon fii yo'o yi'u ko lislaamu on mawni kon, Abuu Sufyaana wi'i Abaasi: (Laamu ɓiɗɗo siɗɗo ma'a on mawnii) Abbaasi jaabii mo: (Bone heɓiima! Ko annabaaku).

Ko nii ballal Allaahu on ngal ariri nelaaɗo Allaahu on (s a w) naati makka ko ɓe udditu ɓe fooluɓe ko aldaa e hare, wonaa hibbugol ƴiiƴan, ko ɓe yankinii ɓe ko ɓe insiniiɓe yetti Allaahu seniiɗo on, ɗun ko konngol joomiraaɗo:

(إِذَا جاء نَصْرُ اللَّهِ وَالْفَتْحُ* وَرَأَيْتَ النَّاسَ يَدْخُلُونَ فِي دِينِ اللَّهِ أَفْوَاجًا *فَسَبِّحْ بِحَمْدِ رَبِّكَ وَاْسْتَغْفِرْهُ إِنَّهُ كَانَ تَوَّاباً)

{Si tawii ballal Allaahu on e uddital ngal arii* a yi'ay yimɓe ɓen hino naata ka nder diina Allaahu on jamaaji jamaaji * Subbunhino yettugol jooma ma'a, insinanoɗaa mo kanko (Allaahu) o wonii jaɓoowo tuubuubuyee}. Suuratu nasru.

Hajju waynitoru ngun:

Saa'i hajjugol ngol hewtii ka hitaande sappaɓere fergu, nelaaɗo Allaahu on (s a w) noddi yimɓe ɓen e yahugol hajju ngun, ɓe anndini yimɓe ɓen wonnde ko ɓe fokkituɓe tottoygol farrilla hajju ngun e nden hitaande, yimɓe ɓen mooɓii nokkeeli ɗin fow e nder suriire aarabeeɓe ɓen fow, haa ɓe woni guluuji teemedere maa ko ɓuri, nelaaɗo Allaahu on (s a w) fokkitidi e maɓɓe ka suudu Allaahu hormanteeru.

Ko e nder nokkuure ɓattiinde Makka Alii (a s) hewtitoyinoo Nelaaɗo Allaahu on (s a w) fii yo'o tottidu e nelaaɗo Allaahu on (s a w) hajju ngun ɓaawo hari nelaaɗo Allaahu on (s a w) hino neli mo Yaman e haaju.

Julɓe ɓen naati Makka ñannde tati donkin e nder nden hitaande tigi tawi ko nelaaɗo Allaahu on (s a w) woni ko ardiiɓe, ɓe hajji hajju maɓɓe ngun haa ɓe fewti Arafa nelaaɗo Allaahu on (s a w) darii ka hoore mbaɗɗateewa maɓɓe ɓe yewti khutba maɓɓe lolluɗo on yeeso on jamaa ɗuuɗuɗo, ɓe yetti Allaahu on ɓe manti mo, ɓaawo ɗun ɓe maaki:

Jiyaaɓe Allaahu ! Mi yamirii on kulol Allaahu... Hulee Allaahu on ka sonnaaɓe, heɗee lan ko mi woni yeetaade on kon, mi anndaa hino gasa en yiidataa ɓaawo ndee hitaande an ɗoo, e oo nokku mo mi woni e mu'un ɗoo.

Ko onon yo yimɓe! Anndee wonnde ƴii'an mo'on ɗan e jawle mo'on ɗen hino harmi e hoore mo'on, haa hawro yon e jooma mo'on wona harmugol nde'e ñalaande mo'on ɗoo, e nder ndii leydi mo'on ɗoo, enee hara mi yottinii? Allaahu seedo.

Ko onon yo yimɓe! Anndee wonnde sonnaaɓe mo'on ɓen hino mari hagghee e hoore mo'on.. Hulee Allaahu on e hoore sonnaaɓe ɓen, wasiyee fii maɓɓe ko moƴƴi.

Ko onon yo yimɓe! (إِنَّمَا الْمُؤْمِنُونَ إِخْوَةٌ) {Anndee wonnde gomɗimɓe ɓen ko siɓɓe}, daganaaki julɗo jawdi ɗimmo makko si wonaa hara ko'e belayee makko, enee hara mi yottinii ? Wata on yiltito ko’on yedduɓe, woɓɓe e mo'on hino piya daaɗe yoga, anndee min mi accanii on ko tawata si tawii on jogitike ɗun on majjataa poomaa , ko deftere Allaahu nden e geyngol suudu anndun, enee hara mi yottinii ? Yaa an Allaau seedo.

Ko onon yo ymɓe ! anndee wonnde jooma mo'on ko gooto, on fow ko'e Aadama iwuɗon Aadama ko'e mbullaari iwi.

(إِنَّ أَكْرَمَكُمْ عِنْدَ اللَّهِ أَتْقَاكُمْ){Anndee ko ɓuri teddude e mo'on ka Allaahu on ko on ɓuruɗo e mo'on hulude, arabeejo maraa ɓural e hoore mo wonaa aarabeejo si wonaa kulol Allaahu ngol, enee hara mi yottinii?

Ɓe wi'i Eyyo.

Ɓe maaki: Tawaaɗo yo hollitu mo tawaaka.. yo jam e kisal wonu e mo'on.

Ngun hajju ɗon wi'iraa (hajju waynitoru) ɓaawo nelaaɗo Allaahu on (s a w) ɓaawo lebbi tati feƴƴii ɓe faatino ka Madiina Munawwara.

Feƴƴingol Nelaaɗo Allaahu on (s a w)

Ɓaawo nelaaɗo Allaahu on (s a w) artii Madiina ɓe yamirno Usaamata bun Zaydu nde o heɓɓindata konu yahugol Saami, nelaaɗo Allaahu on wattidi mo e geece immorde e feruɓe ɓen e lansaari yankooɓe ɓen hari hino tawanoo e ɓen (Abuu Bakri e Umar e Abii Ubayda) ɓaawo ɗun kamɓe Nelaaɗo Allaahu on (s a w) ɓe wullitii nawnaare nde ɓe faatii e mu'un nden.

Nawnaare nelaaɗo Allaahu on (s a w) jokkondiri, nde tiiɗi e maɓɓe balɗe, ñannde go'o Bilaali ari ɓe ka julde subaka tawi nawnaare nden hino fooliɓe, Bilaal noddini: Aree ka julde yo Allaahu on yurme on, nelaaɗo Allaahu on (s a w) wi'i mo: (yo goɗɗo e mo'on julnu, neene Aa'isa wi'i: Yamiree Abuu Bakri yo'o julnu yimɓe ɓen, Neene Hafsa wi'i: Yamiree Umar, Nelaaɗo Allaahu on (s a w) nanngi junngo Alii (a s) ngon e Fadlu bunil Abbaasi ɓe yonngitii e hoore maɓɓe kamɓe ɗiɗo tawi tunndaaje maɓɓe ɗen hino daasaade ka leydi ronkere, ɓaawo ɓe hewtii ka juulirde ɓe tawi Abuu Bakri adike hewtude ka Mihraab, ɓe jooporani mo sookeewo maɓɓe ngon, Abuu Bakri nennii, nelaaɗo Allaahu on (s a w) ɓagii ɓe habbiri ɓe fuɗɗitii julde nden, ɓaawo ɓe salminii ɓe hooti ka galle maɓɓe, ɓe nodditi Abuu Bakri e Umar e jamaa go'o tawanooɓe ka nder juulirde ɓaawo ɗun ɓe maaki {Enee mi yamiraali on siinugol konu Usaama ngun ?} Abuu Bakri wi'i: Min hari mi yahii mi artu fii heyɗintinngol ahadi e ma'a, Umar wi'i: Min mi yaltaali sabu miɗo yiɗi lanndagol fii ma'a sewol ngol.

Nelaaɗo Allaahu on (s a w) : Sinee konu Usaama ngun, ɓe fillitii ɗun laabi tati, ɓaawo ɗun nelaaɗo Allaahu on (s a w) faɗɗaa battane ronkere nden, neeɓi seeɗa julɓe ɓen wulli sowru ndun ɓantii, ɓe ɗiwti ɓe maaki: {Addanee lan tinndoore ndaha mi winndana on kaydi on majjataa ɓaawo mayri poomaa} ɓaawo ɗun ɓe faɗɗaa kadi, woɓɓe e wonndiɓɓe maɓɓe immii ɗaɓɓugol ndaha e karambol, Umaru wi'i: Yilto, lo'ere nden foolii mo!! O yiltii, ɓaawo nelaaɗo Allaahu on (s a w) ɗiwtii woɓɓe e maɓɓe wi'i: enee nelaaɗo Allaahu yo men addu ndaha kan e karambol ngol, nelaaɗo Allaahu on (s a w) maaki : {Ɗun hara ko ɓaawo ko wowlu ɗon kon} ko adii nelaaɗo Allaahu on (s a w) feƴƴinde ɓe maakani Alii : {.. Waɗan ka suudu ma'a yamiroore Allaahu seniiɗo on arii, si tawii wonkii an kin sortaama ƴettiraami junngo ma'a ngon, ɓaawo ɗun fewtinaa mi Ghibla, hikko e fiyaake an on, juulaa mi ado yimɓe ɓen fow, wata a seedu e an haa surraa mi, wallinor Allaahu seniiɗo on}.

Feƴƴingol nelaaɗo Allaahu on (s a w) ko ñannde sappo e jeetati lewru paran waɗunoo e nder hitaande sappo e go'aɓere fergu.